बलाराम तिमिल्सिना
यो देश ,
पहिले सूरक्षित बनाऊ
तिनीहरूको लागि
जो गर्भबाटै असुरक्षित छन् !
ती जन्मेपछि
भेदभावपूर्ण मातृत्वबाट असुरक्षित छन्
‘भेदभावपूर्ण मातृत्व’
तपाई अचम्मित हुनु भयो होला
हो,
देवीजस्तै सम्मान पाएकी
आमाबाट पनि ती असुरक्षित छन् !
ती भाइबाट असुरक्षित छन्
बाऊबाट, दाइबाट
मामाबाट काकाबाट
भिनाजुबाट त ती झन् असुरक्षित छन् !
ती स्कुलमा
शिक्षकबाट असुरक्षित छन्
हो ईश्वरको अर्को रुप मानिएका
ती शिक्षकबाटै ज्यादै असुरक्षित छन् !
कार्यालयमा ती
हाकिमबाट असुरक्षित छन्
न्यायलयमा ती
न्यायधीशबाटै असुरक्षित छन्
गाडीमा यात्रा गर्दा ती
ड्राइभर खलासीबाट असुरक्षित छन् !
ती जव
सुरक्षा माग्न
सुरक्षाकर्मी भएकोमा पुग्छन्
कस्सम
त्यहाँ ती सवैभन्दा बढी असुरक्षित छन् !
गर्भदेखि जन्मसम्म
घरदेखि विद्यालयसम्म
कार्यलयदेखि सुरक्षा चौकीसम्म
जो हरपल असुरक्षित छन्
तिनको सूरक्षाको व्यवस्था गर !
ती
तिम्रो दिमागबाट
तिम्रा आँखाबाट
तिम्रा हातबाट
तिम्रा हरेक अङ्गबाट
तिम्रा बोलीबाट
तिम्रा मठ मन्दिरबाट
तिम्रा अल्लाह र ईश्वरबाट
तिम्रा सुरक्षाका सवै तजविजबाट
ती असुरक्षित नै असुरक्षित छन्
तिनीहरू को हुन् चिन्यौ तिमीले ?
संभवत: तिनीहरू
तिमीबाट पनि असुरक्षित छन् !
पहिले तिमी
तिनीहरूको लागि
सुरक्षाको असली व्यवस्था गर
त्यो कुरा तिम्रो लागि
मान्छे बन्ने पहिलो पाइला हुने छ !
२०७६|०३|२७
सुवर्ण चोक, भक्तपुर