२६ माघ । भारतको उत्तर प्रदेशको झाँसी जिल्लामा त्यहाँको गाउँ पन्चायतले सामाजिक बहिस्कारलाई सकाउनका लागि एक दम्पत्तिलाई गोबर खान र गौमूत्र पिउन निर्देशन दिएको छ ।
यसो नगरेमा त्यो दम्पत्तीले पाँच लाख रुपैयाँ क्षतिपूर्ति दिनु पर्ने आदेश त्यहाँको पन्चायतले जारी गरेको छ । तर, प्रहरीले समयमा पुगेर यस्तो आदेश दिने ६ जनालाई कारवाही गरेको छ । पन्चायतको नजरमा यो दम्पत्तिले अन्तर्जातीय विवाह गर्नु ठूलो अपराध हो ।
यो घटना भएको झाँसी जिल्लाको प्रेमनगरमा हो । त्यहाँका भुपेश यादवले पाँच वर्ष पहिले आस्था जैनसँग विवाह गरेका थिए ।
भुपेशले दुवैका परिवारले यसलाई स्वीकार गरेको तर समाजले यसलाई स्वीकार नगरेको र समाजबाट बहिस्कार गरेको आरोप लगाएका छन् ।
‘समाजबाट बहिस्कार गर्नेमात्र होइन, हाम्रो बाबुलाई धम्की पनि दिइएको थियो,’ भुपेशले भनेका छन्, ‘गत वर्ष बहिनीको विवाहमा पनि छिमेकका कोही पनि आएनन् । अनि अहिले आएर यो सामाजिक बहिस्कारलाई मान्यता दिन गोबर खानु पर्ने र गौमूत्र पिउनु पर्ने बताइएको छ । यसो नगर्ने हो भने पाँच लाख रुपैयाँ मागिएको छ । हामीले पन्चायतको यो सर्तलाई अस्वीकार गरिदिएका छौँ ।’
भुपेशले पन्चायतको यो फैसलाबारे प्रहरीमा उजुरी पनि दिएका छन् । त्यसैले प्रहरीले त्यहाँको पन्चायतका पाँच जनालाई पक्राउ गरेको हो ।
भुपेशकी पत्नी आस्था एउटा कलेजमा काम गर्छिन् । उनले पनि प्रेम विवाह गर्दा पनि दुवै परिवारले आफूहरुलाई स्वीकार गरेको तर समाजले आफ्नो परिवारलाई बहिस्कार गरेको बताएकी छिन् । फरक धारबाट
