शम्भु चौधरी, लहान १६ माघ । लागू औषध विरुद्धको बोल,खेलाडी उत्पादनमा जोड भन्ने मुल नाराका साथ नवराजपुर गाउँपालिका ५ मा वडा स्तरीय बिपिएल सिजन क्रिकेट प्रतियोगिता २०८२ आज सम्पन्न भएको छ। प्रतियोगिताले स्थानीय युवामा खेलकुदप्रति आकर्षण बढाउनुका साथै सामाजिक सचेतना फैलाउने लक्ष्य लिएको आयोजकले जनाएको छ ।
वडा स्तरमै खेलकुद गतिविधिलाई प्रोत्साहन गर्ने उद्देश्यले आयोजना गरिएको उक्त प्रतियोगितामा विभिन्न टिमहरूको उत्साहजनक सहभागिता रहेको थियो। फाइनल खेल देवनगर र कुसंडी टिमबीच प्रतिस्पर्धात्मक रूपमा सम्पन्न भएको थियो। दुवै टिमले उत्कृष्ट खेल प्रदर्शन गरे पनि अन्ततः देवनगर टिम विजयी बन्न सफल भयो।
प्रतियोगिताको समापन समारोहमा सिरहा निर्वाचन क्षेत्र २ का प्रतिनिधि सभा जसपा नेपालका उम्मेदवार संजिव यादव प्रमुख अतिथिका रूपमा सहभागी थियो। त्यसैगरी विशिष्ट अतिथिका रूपमा गाउँपालिका अध्यक्ष शिव उदगार यादव, वडा ५ का वडा अध्यक्ष जय प्रकाश यादव तथा वडा १ का वडा अध्यक्ष नविन यादवको उपस्थिति रहेको थियो। अतिथिहरूले विजेता तथा उपविजेता टिमलाई ट्रफी, मेडल तथा प्रमाणपत्र प्रदान गर्दै खेलाडीहरूको हौसला बढाएका थिए।
कार्यक्रमलाई सम्बोधन गर्दै प्रमुख अतिथि संजिव यादवले खेलकुदले युवालाई अनुशासित, स्वस्थ र जिम्मेवार बनाउने बताउनुभयो। उहाँले लागूऔषध दुर्व्यसन समाजका लागि गम्भीर चुनौती बन्दै गएको उल्लेख गर्दै त्यसबाट युवालाई जोगाउन खेलकुद, शिक्षा र सचेतना कार्यक्रम आवश्यक रहेको धारणा राख्नुभयो। उहाँले आफू निर्वाचित भएमा यस क्षेत्रमा मिनी क्रिकेट स्टेडियम निर्माणका लागि पहल गर्ने प्रतिबद्धता पनि व्यक्त गर्नुभयो।
आयोजकका अनुसार प्रतियोगिताले खेलकुदसँगै सामाजिक सन्देश प्रवाह गर्ने उद्देश्य पूरा गरेको छ। सहभागी खेलाडीहरूले पनि यस्ता कार्यक्रमले आफूहरूलाई ऊर्जा र प्रेरणा दिने बताएका छन्। स्थानीय स्तरमा आयोजना हुने यस्ता प्रतियोगिताले गाउँ–समाजमा सकारात्मक वातावरण सिर्जना गर्नुका साथै युवालाई रचनात्मक गतिविधितर्फ उन्मुख गराउने विश्वास लिइएको छ।
