शम्भु चौधरी सिरहा, १७ असोज । थारु समुदायको संस्कृति र जितिया पर्वसँग सम्बन्धित थारु लघु चलचित्र ‘लैहरा’ आज देखि हातिदहमा प्रदर्शनमा आउने भएको छ।
समुदायको कला सांस्कृतिक थारु परम्परा र धार्मिक आस्थालाई दर्शाउने उद्देश्यले निर्माण गरिएको यो फिल्म दर्दनायक कथामा आधारित रहेको निर्देशक शिव थारुले बताए ।
फिल्ममा थारु समुदायमा विशेष महत्व राख्ने जितिया पर्वमा महिलाहरूले लैहर जानु पर्ने परम्परा र त्यससँग जोडिएका संघर्ष, पीडा तथा संवेदनशील घटनाहरूलाई यथार्थपरक शैलीमा प्रस्तुत गरिएको छ। निर्देशक थारुको भनाइ अनुसार, ‘लैहरा’ केवल मनोरञ्जनका लागि नभई थारु समुदायको मौलिक संस्कृति, परम्परा र संस्कारलाई संरक्षण र नयाँ पुस्तामा परिचय गराउने उद्देश्यले निर्माण गरिएको हो।
१०० रुपैयाको टिकटदरमा प्रदर्शन भइरहेको यस फिल्मको पहिलो शो सिरहाको ढोढना स्थित राजदेवी मन्दिरको सभा हलबाट शुरु गरिएको थियो र आजबाट लहान १५ कै हातिदह सिमसार क्षेत्रमा विहान ११ बजेबाट शूरु हुने निर्दैशक थारुले बताए । स्थानीय दर्शकहरूको उपस्थिति उल्लेख्य रहेको र फिल्मप्रति चासो देखिएको आयोजकहरूले बताएका छन्।
थारु समुदायमा लोकप्रिय मानिएको जितिया पर्व महिलाहरूले आस्था, श्रद्धा र परिवारको सुखसमृद्धिको लागि मनाउने महत्वपूर्ण पर्व हो। यसै पर्वमा आधारित भएर निर्माण गरिएको ‘लैहरा’ फिल्मले स्थानीय संस्कृतिको जगेर्ना गर्ने मात्र नभई, सांस्कृतिक विविधता र सामुदायिक एकताको सन्देशसमेत दिने अपेक्षा गरिएको छ।
