महेश सिंह,सिरहा-सिरहाको धनगढीमाई नगरपालिका–१२ का वडाध्यक्ष जयप्रकाश ठाकुरले गैरकानुनी रूपमा भारतीय नागरिकलाई नेपाली बनाइदिएको खुलासा भएको छ। वडाध्यक्ष पदमा निर्वाचित भएपछि उनले कानुनको दुरुपयोग गरी आफ्ना नातेदारलाई नागरिकता दिलाएको तथ्य बाहिर आएको हो।
वडाध्यक्ष ठाकुर, स्थानीय रामप्रमोद ठाकुरका जेठा छोरा हुन्। उनका भाइ बिरेन्द्र ठाकुर र तीन छोरी पनि छन्। प्राप्त विवरण अनुसार, अध्यक्ष ठाकुरले आफ्नी जेठी छोरीको जेठो छोरा दिनेश शर्माको छोरा (बिहारका रत्न शर्मा) लाई आफ्ना भाई बनाई नेपाली नागरिकताको लागि सिफारिस गरेका थिए।
त्यसैगरी, अर्का भारतीय नागरिक (बिहारका दिनेशकुमार ठाकुर) लाई आफ्नै भिनाजुको छोरा भनेर झूटो प्रमाण पेश गरी सिफारिस गरिएको खुलासा भएको छ। सो क्रममा अध्यक्ष ठाकुरले प्रहरी सहर तथा जग्गा मुचुल्कासम्म बनाइ झुटा कागजात पेश गरेको प्रमाण सार्वजनिक भएको छ।
उनीहरूले तयार पारेको सिफारिसपत्र २०७९ साल भदौ २३ गते दर्ता नं. १३५ मा ईलाका प्रशासन कार्यालय लहान पठाइएको थियो। सो दस्तावेज तत्कालीन शाखा अधिकृत अर्जुनकुमार मण्डलमार्फत ‘भुल सुधार’का नाममा २०७९ भदौ २८ गते जिल्ला प्रशासन कार्यालय सिरहा पठाइएको थियो।
स्थानीयवासीका अनुसार, वडाध्यक्षमा निर्वाचित भएपछि ठाकुरले कानुनलाई आफ्नै ‘हत्केलामा राखेर’ यस्तो गैरकानुनी काम गरेका हुन्। घटनापछि नगरवासीले वडाध्यक्षमाथि छानबिन गरी आवश्यक कारबाही गर्न माग गरेका छन्।
