लहान १५ असार । असार महिनामा आकाशबाट पानी झर्ने आशमा रहेका किसानहरू यस वर्ष पनि निराश हुनुपरेको देखिन्छ। लामो समयदेखि वर्षा नहुँदा सिरहा सप्तरी लगायतका थुप्रै जिल्लाका किसानहरूले धान रोपाइँ सुरु गर्न समेत पाएका छैनन्।
सामान्यतया असार १५ सम्ममा धान रोपाइँ चरममा पुग्ने भए पनि यस वर्षको लामो खडेरीले खेत सुकेका छन्। खेतमा पानी नहुँदा न त गोरु जोत्न सकिएको छ, न त रोपाइँ सुरु गर्न।
खेत खेतमा सिचाईको उचित व्यवस्था भए तापनि सडेरीका कारण कल बोर्ढिग पनि सुक्न थालेका छन । कुनै कुर्न बोर्डिग गहिरोका कारण नसुके पनि विधुतिय भोल्टेजका कारण समयमा सिचाई गर्न पाईरहेको छैन ।
सिरहा धनगडीमाई नगरपालिका १ बाखर किसान शिवु महोका अनुसार गत वर्ष पनि ढिलो वर्षा भएको थियो, तर यति धेरै ढिलो थिएन। खेतमा चिरा फाटेको छ, पानी बिना कसरी रोपाइँ गर्ने दुखेसो पोखे ।
स्थानीय सिँचाइको सुविधा पनि सीमित भएकाले जमिनमा पानी पुर्याउन नसकिएको किसानहरूको गुनासो छ। ट्युबेल तथा इनारहरूबाट सिँचाइ गर्न खोज्दा पनि भू जल सतह घटेका कारण पर्याप्त पानी पाउन मुस्किल परेको छ।
खडेरीका कारण समयमै धान रोपाइँ हुन नसके यस वर्ष धान उत्पादनमा भारी गिरावट आउने देखिएको छ। कृषि प्राविधिकहरूका अनुसार धान रोपाइँको उपयुक्त समय यही असार महिनामा हो, र ढिलो रोपाइँ गर्दा उत्पादनमा ३० देखि ५० प्रतिशतसम्म ह्रास आउन सक्छ।
कृषि विकास शाखा धनगढीमाई नगरपालिका कृषि अधिकृत मसिलाल साहका अनुसार हामी किसानलाई अन्य विकल्पका रूपमा सिँचाइ युक्त क्षेत्र तिर स्थानान्तरण गर्न सल्लाह दिइरहेका छौँ। तर अधिकांश किसान परम्परागत तरिकामा निर्भर छन्।”
कृषकहरू अहिले आकाशतिर हेरेर वर्षाको प्रतीक्षा गरिरहेका छन्। खडेरी यस्तै रहिरहे खाद्य सुरक्षामै समस्या पर्न सक्ने चिन्ता स्थानीय निकायहरूलाई पनि लागेको छ।
