सोलुखुम्बु १५ फाल्गुन /दिउँसै सदरमुकाम सल्लेरीको पसलवाट चोरी गरेको आरोपमा एक महिलालाई प्रहरीले पक्राउ गरेको छ । सोलुदुधकुण्ड नगरपालिका ५ का राजु श्रेष्ठको पसलबाट चोरी गरेको सामग्री सहित ति महिलालाई पक्राउ गरिएको सोलुखुम्बु प्रहरीले जनाएको छ ।
सोलुदुधकुण्ड नगरपालिका वडा नम्बर ३ घर भएकी ३५ बर्षिया निम पुटी शेर्पालाई मंगलबार बिहान पक्राउ गरिएको जिल्ला प्रहरी कार्यालय सोलुखुम्बुका प्रहरी निरिक्षक महेन्द्र दर्नालले जानकारी दिए । शेर्पाले सोमबार दिउँसो पसलवाट सामान चोरी गरेकी थिइन् । सोमबार दिउँसो पसल अगाडी ट्याम्पु राखेर सामान लोड गरी लगेको सिसिटिभि फुटेजबाट पत्ता लागेको पसल सञ्चालक राजु श्रेष्ठको भनाई छ ।
सोही फुटेजको आधारमा खोजी गर्दै जानेक्रममा उनलाई घरबाटै पक्राउ गरिएको प्रहरीले जनाएको छ । प्रहरीका अनुसार शेर्पालाई अदालतबाट म्याद थप गरी अनुसन्धान भइरहेको छ ।
