सिरहा २३ भदौ । थारु पत्रकार संघ नेपालमा राजनीतिक हस्तक्षेप भएको गुनासो गर्दै संस्थामा रहेका केही सदस्यहरुले असन्तुष्टि व्यक्त गरेका छन्। चितवनको सौराहामा भदौ २१ र २२ मा आयोजित चौथो महाधिवेशनमा ‘संस्थाको विधान सम्बत नगई सल्लाहकारहरुले एकलौटी ढंगबाट केन्द्रीय पदाधिकारी चयन गरेको’ भन्दै थारु पत्रकारहरुले असन्तुष्टि व्यक्त गरेका हुन्।
संघका महासचिव किशोर चौधरी, कोषाध्यक्ष प्रतिमा चौधरीका साथै चार केन्द्रीय सदस्यहरु सहदेव चौधरी, कुलदीप चौधरी, लक्ष्मी चौधरी र सीताराम चौधरी सहित ६ जिल्ला शाखाले महाधिवेशन विधान विपरीत गर्न नहुने भन्दै ‘विरोध जनाएका थिए ।
संघका निकट पत्रकारहरुले महासचिवको आर्थिक प्रतिवेदन केन्द्रीय समितिबाट पास नभएको, कोषाअध्यक्षको प्रतिवेदन पास नभएको, संस्था नवीकरण नभएको संसोधित विधान प्रक्रिया पुरा नभएको आरोप समेत लगाएका छन्।
संघका महासचिव चौधरीले भने, ‘महाधिवेशन विधान विपरीत भयो। हामीले विधानमा टेकेर चुनाव गरौँ भन्दा नमाने पछि कामी असहमति जनायौ। हामीलाई विधान विपरीत र केन्द्रीय कार्य समितिको माइन्युटिङ नै नगरी चुनाव गराएको चित्त बुझेन।’ असन्तुष्ट पत्रकारहरुले नयाँ संस्था खोल्ने चेतावनी समेत दिएका छन्।
पत्रकारहरुको असन्तुष्टका वावजुद पनि चुनिएको नयाँ कार्यसमितिमा दाङका सन्तोष दहितलाई अध्यक्ष बनाइएको छ।
