महेश सिंह लहान -अखिल (क्रान्तिकारी) को आसन्न निर्वाचनलाई लक्षित गर्दै विद्यार्थी नेता अभिमन्यु यादवले केन्द्रिय उपाध्यक्ष (मधेसी) पदमा आफ्नो उम्मेदवारी घोषणा गरेका छन्। यादवले ३२ वर्षे उमेरहदको संस्थागत निर्णयको अभियन्ताका रूपमा अगाडि बढ्ने प्रतिबद्धता व्यक्त गरेका छन्।
‘नयाँ नीतिअनुसार, नेतृत्व पनि नयाँ पुस्ताले सम्हाल्नुपर्छ,’
यादवले भने, ‘म अखिल क्रान्तिकारीलाई फेरि सडकको बाघ बनाउन चाहन्छु।’ भ्रष्टाचार, व्यथिति तथा सरकारका जनविरोधी गतिविधिहरूविरुद्ध सडकबाट प्रतिवाद गर्ने आफ्नो प्राथमिकता रहेको उनले बताए। यादवले स्ववियुमा संगठन बलियो बनाउँदै समाजवादी शिक्षाका लागि संघर्ष जारी राख्ने बताएका छन्।
उनी लामो समयदेखि विराटनगरको महेन्द्र मोरङ क्याम्पसमा विद्यार्थी राजनीतिमा सक्रिय रहँदै आएका छन्। विद्यार्थीहरूको हक अधिकारका लागि निरन्तर आवाज उठाउँदै आएका यादव कुशल वक्ता तथा रणनीतिक नेताका रूपमा परिचित छन्।
माओवादी केन्द्रको भातृ संगठन अखिल (क्रान्तिकारी) ले आगामी माघ १२ गते देशभर निर्वाचनको घोषणा गरेको छ।
यसै सन्दर्भमा यादवले राष्ट्रियता, जनजीविका तथा शिक्षामा समाजवादी दृष्टिकोणलाई स्थापित गर्नका लागि आफ्नो उम्मेदवारी महत्वपूर्ण हुने विश्वास व्यक्त गरेका छन्।
उनले सम्पूर्ण विद्यार्थी समुदायलाई आफ्नो पक्षमा मतदान गर्न अपिल गर्दै भने, ‘तपाईंहरूको समर्थनले मात्र परिवर्तन सम्भव छ।’
विद्यार्थी राजनीतिमा आफ्नो अनुभव र क्षमताका आधारमा अभिमन्यु यादवलाई अत्यधिक मतले विजयी गराउन सम्पूर्ण मतदातालाई अनुरोध गरिएको छ।
