गुणैगुणले भरीएको जीवन्तिका (गुर्जो) सेवन गरौ

लहान २ जेष्ट । गुर्जो सम्वन्धमा तपाईं पनि जानकारी लिएर सेवन गर्नुहोस । गुर्जो, गुरगुज या गिलोय ९अंग्रेज़ीस्टीनोस्पोरा कार्डीफोलिया० वनस्पतिको उपयोगिताको बारेमा आफुले प्रयोग गर्नलागेको हुँदा साथीहरूले पनि प्रयोग गर्न चाहनुहुन्छहोला । यो कहाँ उपलब्ध हुनसक्छ, यसलाई कसरी चिन्ने आदी सम्बन्धमा तपाईंहरुको जिज्ञासाको लागि यो छोटो जानकारी राख्न चाहन्छु ।
यो एक बहुवर्षिय लहरा हो । पानको पात जस्तो मुटुको आकारको यसको पात हुन्छ । आयुर्वेदमा यसलाई अमृता, गुडुची, छिन्नरुहा, चक्रांगी, आदि नामले चिनिन्छ । यसको सेबन गर्नाले अमृतको जस्तो गुणकारी हुने भएकोले अमृता वा जीवन्तिका नाम दिइएको छ । यसको लहरा वन जंगल, खेत, पहाड़ लगायतको बिभिन्न स्थानमा रुख विरुवा माथि लहरा भएर चढेको पाइन्छ । नीम, आम, बांस इत्यादी प्रजातिका रुखहरुमा अक्सर पाइन्छ । जुन रुखमा लत्रेको हुन्छ त्यस रुखको गुण स्वभाबिक रुपमा यस लहरामा पनि सन्निहित हुने भएकोले निमको रुख माथी चढेको लहरा अरुभन्दा बढी श्रेष्ठ र गुणकारी हुन्छ । यसको लहरा पेन्सिल देखि बुढी औंला जति मोटो हुन्छ वा धेरै पुरानो विरुवा छ भने त्यस भन्दा पनि केही मोटो हुनसक्छ । यसको गांठ गांठहरुबाट जरा निस्किएर तल तिर झुण्डिएर रहेको हुन्छ जसले माटो पाउने बित्तिकै त्यसैबाट पुनः नयाँ विरुवा पलाएर आउंछ ।
यसको लहराको बाहिरी एकदमै पातलो बोक्रा हटाएर भित्रको हरियो गुद्दीदार काण्ड सेबन योग्य हुन्छ र यसको स्वाद एकदमै तितो हुन्छ । यसको फूल पहेलो र फल ग्रीष्म ऋतुमा गुच्छामा फलेको सानो सानो मटरको दाना जस्तो हुन्छ । यसलाई आबश्यकता अनुसार गमलामा पनि रोपण गरि हुर्काउन सकिन्छ ।