लहान ६ बैशाख । शनिबार साँझ आएको हावाहुरीका कारण सिरहा सखुवानन्कारकट्टी गाउँपालिका–२ मकरामपुरका ६० वर्षीया किसुनवती यादव घरको पर्खाल भत्किँदा मृत्यु भएको छ ।
मृत्यु हुनेमा स्थानीय विन्देश्वर यादवकी श्रीमती किसुनवती यादव रहेकी छिन । साँझ घरमै बसिरहेको अवस्थामा आएको तीव्र गतिको हावाहुरीले घरको जस्तापाता उडाएको थियो । जस्तापाता उडेसँगै घरको पर्खाल भतकेका थिए । पर्खाल भत्किँदा इँटाले टाउकोमा गम्भिर चोट लागेर उनी घाइते भएकी थिइन् । चोटका कारण उनको घटना स्थलमै मृत्यु भएको प्रहरीले जनाएको छ ।
जिल्ला प्रहरी कार्यालय सिरहाका प्रवक्ता एवं प्रहरी नायब उपरीक्षक रमेशबहादुर पालका अनुसार घटना लगत्तै प्रहरी टोली घटनास्थल पुगेको थियो । उनका अनुसार, प्रहरीले घटनाको मुचुल्का उठाएर शव परीक्षणका लागि पठएको छ ।
जिल्लामा आएको हावाहुरीले जनजीवन प्रभावित बनाएको छ भने अन्य क्षेत्रमा भएको क्षतिको विवरण पनि सङ्कलन भइरहेको प्रहरीले जनएको छ ।
