शम्भु चौधरी,लहान,फाल्गुन ३ । लहान नमुना इङ्लिस बोर्डिङ स्कुल लहान ४ र नेशनल एकेडमी लहान ५ को संयुक्त आयोजनामा अभिभावक दिवस २०८२ शनिावर एक कार्यक्रम बीच सम्पन्न भएको छ।
कार्यक्रमका प्रमुख अतिथिका लहान नगरपालिकाको शिक्षा शाखा प्रमुख अमिरी कुमार यादवको उपस्थिति रहेको थियो भने विशिष्ट अतिथिमा विद्यालयकी संस्थापक नजमा तवस्सुम, शिक्षा शाखा समितिका सदस्य राजकुमार सिंह तथा पडरीया थारुटोल मा वि का मनोज कुमार यादव रहनुभएको थियो।
कार्यक्रमलाई सम्बोधन गर्दै प्रमुख अतिथि यादवका अनुसार गुणस्तरीय शिक्षाका लागि विद्यालय र अभिभावकबीच समन्वय अपरिहार्य रहेको धारणा राख्नुभयो। उहाँले विद्यार्थीको शैक्षिक उपलब्धिसँगै नैतिक शिक्षा र सामाजिक जिम्मेवारीबोध पनि उत्तिकै महत्वपूर्ण हुने उल्लेख गर्नुभयो। उहाँले विद्यालयले शैक्षिक उत्कृष्टतासँगै चरित्र निर्माणमा ध्यान दिनुपर्ने आवश्यकता औँल्याउनुभयो।
कार्यक्रममा बोल्दै स्कुलका प्रिन्सिपल शम्भु राईले “शिक्षा भनेको केवल पाठ्यपुस्तकको ज्ञान मात्र नभई जीवन जिउने कला हो” भन्ने विचार व्यक्त गर्नुभयो। उहाँले शिक्षाको वास्तविक अर्थ विद्यार्थीको सोच, व्यवहार र जिम्मेवारीबोधमा परिवर्तन ल्याउनु भएको बताउँदै समग्र व्यक्तित्व विकासमा जोड दिनुपर्ने धारणा राख्नुभयो। अभिभावक दिवसका अवसरमा विद्यार्थीहरूले विभिन्न सांस्कृतिक प्रस्तुति, नृत्य, गीत तथा नाटक प्रस्तुत गरेका थिए। प्रस्तुति हेर्न उपस्थित अभिभावकहरू उत्साहित देखिन्थे। कार्यक्रमले विद्यार्थीको प्रतिभा प्रदर्शनका साथै अभिभावक र विद्यालयबीच आत्मीय सम्बन्ध सुदृढ बनाउन सहयोग पुर्याएको आयोजकले जनाएको छ।
यसै अवसरमा विद्यालयका पूर्व विद्यार्थी इफ्ति हसन राइनलाई सम्मान पत्र प्रदान गरी सम्मान गरिएको थियो। विद्यालयले उहाँको शैक्षिक तथा सामाजिक योगदानको कदर गर्दै सम्मान गरेको जनाएको छ। सम्मान ग्रहण गर्दै राइनले विद्यालयप्रति कृतज्ञता व्यक्त गर्दै आफूले प्राप्त गरेको शिक्षाले जीवनमा अघि बढ्न प्रेरणा दिएको बताउनुभयो।
समग्रमा, अभिभावक दिवस २०८२ ले विद्यालय, शिक्षक, विद्यार्थी र अभिभावकबीचको सम्बन्धलाई अझ सुदृढ बनाउँदै शिक्षाको गुणस्तर अभिवृद्धिमा सामूहिक प्रतिबद्धता व्यक्त गर्ने अवसर प्रदान गरेको सहभागीहरूले बताएका छन्। कार्यक्रम सौहार्दपूर्ण वातावरणमा सम्पन्न भएको थियो।
कार्यक्रमको अध्यक्षता स्कुलका निर्देशक मोहम्मद मुसतफा रहमानीले गर्नुभएको थियो।
