लहान २९ साउन । सिरहाको धनगढीमाई नगरपालिका न पा ११ आमचौक बस्ने लहान नगरपालिका २४ मल्हनामाका ८८ वर्षीय फनिलाल यादवको हत्या आरोपमा प्रहरीले दुई जनालाई पक्राउ गरि पत्रकार सम्मेलन मार्फत सार्वजानिक गरेका छन।
पक्राउ पर्नेमा धनगढीमाई २ भवानीपुरका ३३ वर्षीय महेश चौधरी र १९ वर्षीय प्रशान्त मण्डल रहेका छन्। उनीहरुले चोरी गर्ने उद्देश्यले गएको र घरभित्र छिरेपछि ती वृद्ध हल्ला गर्ने थालेपछि हत्या गरेको अनुसन्धानमा खुलेको सम्मेलनमा सिरहा प्रहरी प्रमुख एसपी अनन्तराम शर्माले बताए।
चौधरीको साथमा रहेको खुकुरी प्रहार भएको प्रहरीले जनाएको छ। खुकुरी र चप्पल घटनास्थलबाट बरामद भएको छ।
यादवको साउन १४ गते आम चौकमा हत्या भएको थियो । सीसीटीभी फुटेजको सहयोग र हत्या भएको ठाउँमा छुटेको चप्पललाई पन्छाउँदै जाँदा साउन २३ गते आरोपित मण्डल पक्राउ परेका थिए। मण्डलले दिएको बयानका आधारमा चौधरी २७ गते पक्राउ परेको हो।
इलाका प्रहरी कार्यालय लहान, जिल्ला प्रहरी कार्यालय सिरहा, मधेस प्रदेश र केन्द्रीय अनुसन्धान टोलीले संयुक्त रूपमा छानबिन गरिरहेको एसपी शर्माले बताए। जिल्ला अदालतबाट अभद्र व्यवहार कसुरमा ७ दिनको म्याद थप भई अनुसन्धान भइरहेको उनले बताए ।
