लहान जेठ २० । सवारी ज्यान मुद्दामा मिलाइदिने प्रलोभन देखाउँदै रु. १ लाख ७० हजार ठगी गरेको आरोपमा एक युवक पक्राउ परेका छन्। जिल्ला सिरहा, विष्णुपुर गाउँपालिका वडा नं १ गौरीपुर निवासी ३२ वर्षीय प्रमोद कुमार महतो पक्राउ परेका हुन्।
आरोप अनुसार, मिति २०८१ साल असार २७ गते बिहान ११.०० बजे उनले रानी देवीकी छोरा विवेक यादवलाई प्रहरी हिरासतबाट छुटाइदिने आश्वासन दिँदै उक्त रकम लिएका थिए।
महतोले जिल्ला सिरहा, सिरहा नगरपालिका वडा नं. १६ माडरकी ४८ वर्षीया रानी देवी यादवसँग सवारी ज्यान मुद्दा मुद्दा नं ३६६० मिलाइदिने भन्दै ठगी गरेको जिल्ला प्रहरी कार्यालय सिरहाले जनाएको छ।
विवेक यादव सोही सवारी ज्यान मुद्दामा संलग्न रहेका कारण जिल्ला प्रहरी कार्यालय सिरहाको हिरासतमा रहेका थिए। महतोले आफूले मुद्दा मिलाइदिने, छुटाइदिने र प्रभावशाली व्यक्तिहरूलाई बुझाइदिने जस्ता बहानामा रकम लिएको जाहेरीमा उल्लेख गरिएको छ।
जाहेरीका आधारमा अनुसन्धान अघि बढाउँदै सिरहा प्रहरीले महतोलाई मिति २०८२ साल जेठ १९ गते साँझ ६ बजे पक्राउ गरेको हो। उनलाई सम्मानित जिल्ला अदालत सिरहाबाट चार दिनको म्याद थप गरी अनुसन्धान अगाडि बढाइएको जिल्ला प्रहरी कार्यालय सिरहाका प्रवक्ता डीएसपी बिरेन्द्र कुमार पासमानले जानकारी दिए। प्रहरीले ठगी मुद्दामा थप अनुसन्धान जारी रहेको जनाउँदै, पीडितले न्याय पाउने सुनिश्चितता दिलाउने प्रतिवद्धता जनाएको छ।
