असाेज १३ सिरहा । अख्तियार दुरुपयोग अनुसन्धान आयोगले प्रदेश–२ को मुख्यमन्त्री तथा मन्त्रिपरिषद् कार्यालयमा छापा मारेपछि राष्ट्रिय एकता अभियानले मुख्यमन्त्री लालबाबु राउत गद्दीको राजीनामा माग गरेको छ ।
अख्तियारले छनविन पुरा नगरेसम्म मुख्यमन्त्री राउतले राजीनामा दिनुपर्ने अभियानले प्रेस विज्ञप्ति जारी गर्दै माग गरेको छ। यस्ता किसिमको गतिविधी गरी प्रदेश –२ का जनतालाई बदनाम र जनताको करबाट उठेको पैसाको दुरुपयोग भइरहेको अभियानको ठहर छ ।
प्रदेश–२ ले छोरीहरू विद्यालय पठाउने कार्यलाई उत्प्रेरित गर्नेगरी ‘बेटी पढाउ, बेटी बचाउ’ कार्यक्रम सञ्चालन गरेर बालिकाहरूलाई साइकल वितरण गरेको छ । उक्त साइकल खरिद र वितरण कार्यमा अनियमितता भएको उजुरी परेपछि अख्तियारले त्यससम्बन्धी कागजात लिन छापा मारेको हो ।
जारी विज्ञप्तिमा भनिएको छ, ‘प्रदेश–२ को मुख्यमन्त्री तथा मन्त्रिपरिषद् कार्यालयमा अख्तियार दुरुपयोग अनुसन्धान आयोगले छापा मारेको विषयमा राष्ट्रिय एकता अभियानको ध्यानार्षण भएको छ । संघीयतालाई धरापमा पार्ने किसिमले मूख्य मन्त्री लालबाबु राउत गद्दीले प्रदेशको मन्त्रीहरुलाई भष्ट्राचार गर्न प्रेरित गरेको र आफु पनि भ्रष्टाचार गर्न लिप्त रहेको नेपाली जनता माझ लुकेको छैन ।
आज अख्तियार दुरुपयोग अनुसन्धान आयोगले मुख्यमन्त्री तथा मन्त्रिपरिषद् कार्यालयमा छापा मारी केही कागजातहरु जफत हुनु यसलाई पुष्टि गर्दछ । प्रदेश सरकार भ्रष्ट्र रहेको कुरा राष्ट्रिय एकता अभियानले महिनौ देखी उठाउदै आएको सर्बवितितै छ । यस्ता किसिमको गतिविधी गरी प्रदेश –२ का जनतालाई बदनाम र जनताको करबाट उठेको पैसाको दुरुपयोग भईरहेको राष्ट्रिय एकता अभियानको ठहर छ। 
