१५ पुस । बंगलबादेशकी पूर्व प्रधानमन्त्री बेगम खालिदा जियाको निधन भएको छ। उनको ८० वर्षको उमेरमा निधन भएको हो।मंगलबार विहान स्थानीय समय अनुसार ६ बजे ढाकाको एवरकेयर अस्पतालमा उनको निधन भएको अन्तराष्ट्रिय सञ्चार माध्यमले जनाएका छन्।
खालिदा जियाको जन्म १५ अगस्ट १९४५ मा बंगलादेशको दिनाजपुर जिल्लामा भएको थियो। उनको विवाह बंगलादेशका पूर्व राष्ट्रपति तथा सैनिक शासक जियाउर रहमानसँग भएको थियो। सन् १९८१ मा जियाउर रहमानको हत्या भएपछि खालिदा जिया सक्रिय राजनीतिमा प्रवेश गरिन्।
खालिदा जिया बंगलादेश नेशनलिस्ट पार्टीकी नेता बनेपछि छिट्टै देशको प्रमुख विपक्षी शक्ति स्थापित गरिन्। उनी पहिलोपटक सन् १९९१ देखि १९९६ सम्म बंगलादेशकी प्रधानमन्त्री बनिन्। दोस्रोपटक सन् २००१ देखि २००६ सम्म प्रधानमन्त्रीको जिम्मेवारी सम्हालिन्।
उनको शासनकालमा बहुदलीय लोकतन्त्र मजबुत बनाउने प्रयास, आर्थिक सुधार, तथा पूर्वाधार विकासमा ध्यान दिइएको मानिन्छ।
उनी बंगलबादेश नेशनलिस्ट पार्टीकी प्रमुख थिइन् र बांग्लादेशको पहिलो महिला प्रधानमन्त्री थिइन्। लामो समयदेखि गम्भीर स्वास्थ्य समस्यासँग जुधिरहेकी उनको मृगौला र फोक्सोमा समस्या थियो।
खालिदा जिया बंगलादेशको राजनीतिमा गहिरो छाप छोड्ने नेतृ हुन्। समर्थकहरूका लागि उनी लोकतन्त्र र राष्ट्रियताको प्रतीक मानिन्छिन् भने आलोचकहरूले उनको शासनकाल र कानुनी विवादमाथि प्रश्न उठाउने गरेका छन्। जे भए पनि, बंगलादेशको आधुनिक राजनीतिक इतिहासमा उनको भूमिका अत्यन्त महत्वपूर्ण रहेको छ।
उनको निधन त्यतिबेला भएको छ, जतिबेला बंगलादेशको राजनीतिमा संटकपूर्ण अवस्थाबाट गुज्रिरहेको छ। खालिदा जिया दशकौंसम्म देशको राजनीतिक परिदृश्यमा महत्वपूर्ण भूमिका निर्वाह गरेकी थिइन्।
