नयाँ लगानीकर्ताका लागि लहानमा शेयर बजार प्रशिक्षण अभियान सुरु

महेश सिंह लहान,- वित्तीय साक्षरताको महत्व बुझाउँदै ग्लोबल मनी वीक २०२५ को अवसरमा दिपशिखा धितोपत्र कारोबार कम्पनी स्टक ब्रोकर नम्बर ३८, लहान शाखा द्वारा सफटेक कलेज, लहान मा शेयर बजार लगानीसम्बन्धी सचेतना कार्यक्रम सम्पन्न भएको छ।
कार्यक्रममा १५० जना विद्यार्थीको सहभागिता रहेको थियो। सहभागीहरूलाई शेयर बजारको परिचय, लगानी रणनीति, जोखिम व्यवस्थापन, तथा बजार सञ्चालनका आधारभूत पक्षहरू बारे विस्तृत जानकारी दिइयो। लहान शाखाका प्रबन्धक शिवानन्द चौधरी ले विद्यार्थीहरूलाई नेपालको धितोपत्र बजार, लगानीकर्ताका अधिकार र कर्तव्य, सही लगानी गर्ने तरिका, तथा बजार विश्लेषणका आधारहरू स्पष्ट पार्दै शेयर बजारप्रति सचेत बन्न आवश्यक रहेको बताए।
हाल शेयर बजारप्रति युवाहरूको चासो बढ्दै गएको पाइन्छ। तर, उचित जानकारी अभावका कारण धेरैले हतारमा लगानी गर्ने र नोक्सानी व्यहोर्नुपर्ने अवस्था देखिएको छ। यही सन्दर्भमा दिपशिखा धितोपत्र कारोबार कम्पनीले नयाँ पुस्तालाई सचेत बनाउने उद्देश्यले सचेतना कार्यक्रम सञ्चालन गरेको हो।
कार्यक्रममा सहभागी विद्यार्थीहरूले शेयर बजार सम्बन्धी आधारभूत जानकारी र व्यावहारिक ज्ञान प्राप्त गर्न पाएकोमा खुशी व्यक्त गरेका छन्। सफटेक कलेजका एक विद्यार्थीले भने, “हामीमध्ये धेरैलाई शेयर बजारबारे आधारभूत जानकारी पनि थिएन। अहिले यस कार्यक्रमबाट बजार कसरी चल्छ, कसरी लगानी गर्ने भन्ने बुझ्न पाएँ।”
नयाँ तथा इच्छुक लगानीकर्तालाई शेयर बजारमा सहज रुपमा प्रवेश गराउन दिपशिखा धितोपत्र कारोबार कम्पनीले हरेक शुक्रबार निःशुल्क शेयर तालिम सञ्चालन गर्ने गर्दै आएको छ। यस तालिममा बजार विश्लेषण, सही शेयर छनोट गर्ने विधि, कम्पनीको वित्तीय विवरण बुझ्ने तरिका, तथा जोखिम व्यवस्थापनका उपायहरूबारे प्रशिक्षण दिइन्छ।
कम्पनीका अनुसार लगानीकर्ताले अध्ययन, अनुसन्धान, र बजारको सूक्ष्म विश्लेषण गरी मात्र निर्णय गर्नुपर्ने हुन्छ। यस्ता सचेतना कार्यक्रमले बजारमा नयाँ प्रवेश गर्नेहरूलाई सही दिशा निर्देश गर्ने विश्वास आयोजकको छ।
दिपशिखा धितोपत्र कारोबार कम्पनी हाल देशभर ६ वटा शाखा मार्फत सेवा प्रदान गर्दै आएको छ। कम्पनीको प्रधान कार्यालय काठमाडौं, अनामनगर मा रहेको छ।
संस्थाका अध्यक्ष दिपक राज ओली तथा प्रबन्ध निर्देशक विष्णु राज ओझा रहेका छन्। कम्पनीले शेयर खरिद–बिक्री सेवाका साथै लगानीकर्ता शिक्षाका कार्यक्रमहरूलाई पनि प्राथमिकता दिँदै आएको छ।
कम्पनीका शाखाहरू   धनगढी,कैलाली,महेन्द्रनगर,कञ्चनपुर
चरिकोट,दोलखा,रतननगर,चितवन ,लहान,सिरहा लगायतका जिल्लामा कार्यालय संचालन गरी सेवा प्रवाह गरि रहेका छन्। वित्तीय साक्षरताको महत्त्वलाई उजागर गर्दै दिपशिखा धितोपत्र कारोबार कम्पनीले आगामी दिनमा पनि नयाँ लगानीकर्तालाई लक्षित गरी सचेतना कार्यक्रम तथा तालिमहरू सञ्चालन गर्दै जाने जनाएको छ।
शेयर बजारमा सूचित, सचेत,र जिम्मेवार लगानीकर्ताको आवश्यकता रहेको भन्दै यस्ता कार्यक्रमलाई अझ प्रभावकारी बनाउन निरन्तर प्रयास गरिने कम्पनीको भनाइ छ।