क्यान्सर केयर सेन्टरको व्यवस्थापनमा सुधारको माग, स्थानीय सरकारको भूमिकामा प्रश्न

महेश सिंह लहान-लहान क्यान्सर केयर सेन्टरको स्तरोन्नति र व्यवस्थापनलाई प्रभावकारी बनाउन विभिन्न राजनीतिक दलका नगर अध्यक्ष, नागरिक समाजका अगुवा र सरोकारवालाबीच विशेष छलफल गरिएको छ।
बिहीबार सम्पन्न कार्यक्रममा लहान जेसिजका अध्यक्ष देबन लाल ठाकुर, लायन्स क्लब इन्टरनेशनलका प्रतिनिधिहरू, पत्रकार, एभरेष्ट कलेजका प्रिन्सिपल धरनीधर अधिकारी, प्राध्यापक चक्रपाणी दहाल, कांग्रेस नेता शैलेन्द्र यादव, नेकपा समाजवादी पार्टीका लहान नगर अध्यक्ष विनोद साह लगायतको उपस्थिति थियो।

कार्यक्रममा सिरहा क्षेत्र नम्बर १ का प्रतिनिधि सभा सदस्य राम शंकर यादव प्रमुख अतिथि रहेका थिए। मधेस प्रदेश सभा सदस्य ललिता दास विद्रोहीको विशेष उपस्थिति रहेको कार्यक्रममा अस्पतालको आर्थिक अवस्था कमजोर हुँदा सेवा प्रवाहमा समस्या भइरहेको विषय उठाइएको थियो।
लहान क्यान्सर केयर सेन्टरका अध्यक्ष अशोक लाल अमात्यले अस्पताल सञ्चालनमा आर्थिक अभावका कारण चुनौती थपिएको बताए। “सिरहा, सप्तरी, धनुषा, महोत्तरी र उदयपुरका बिरामीहरूका लागि सहज सेवा उपलब्ध गराउन आर्थिक स्रोतको अभाव महसुस भएको छ,”अमात्यले भने,“स्थानीय सरकार, संघीय सरकार र समुदायको सहयोग विना अस्पतालको दीर्घकालीन सञ्चालन चुनौतीपूर्ण छ।”
उनले अस्पताललाई आवश्यक उपकरण तथा जनशक्ति व्यवस्थापनमा स्थानीय सरकारको ध्यानाकर्षण गराए।
कार्यक्रमका वक्ताहरूले स्थानीय सरकारले अस्पताललाई आवश्यक स्रोतसाधन जुटाउन चासो नदेखाएको गुनासो गरे।प्रमुख अतिथि सांसद यादवले अस्पताललाई थप सुविधा सम्पन्न बनाउन संघीय र प्रदेश सरकारबीच समन्वय आवश्यक रहेको बताए।
प्रदेश सभा सदस्य ललिता दास विद्रोहीले स्वास्थ्य क्षेत्रलाई सरकारले उच्च प्राथमिकतामा राख्नुपर्ने बताइन्।“जनस्वास्थ्य सेवा प्रवाहलाई प्रभावकारी बनाउन हामीले ठोस योजना बनाउन आवश्यक छ,” उनले भनिन्।
अस्पतालले हाल सञ्चालन खर्च जुटाउन विभिन्न स्रोतहरूमा निर्भर रहनुपरेको छ। कार्यक्रमका सहभागीहरूले अस्पतालको सेवा निरन्तरता तथा स्तरोन्नतिका लागि आर्थिक तथा भौतिक सहयोग आवश्यक रहेको बताए।
स्थानीय समुदाय र सरकारी निकायबीचको समन्वयले अस्पताललाई थप प्रभावकारी बनाउन सकिने सहभागीहरूको धारणा थियो।
लहान क्यान्सर केयर सेन्टरले मधेस प्रदेशका विभिन्न जिल्लाका बिरामीहरूलाई उपचार सेवा दिँदै आएको छ। तर आर्थिक अभावले गर्दा सेवा प्रवाहमा चुनौती थपिएको छ।अस्पतालले आगामी दिनमा सेवा विस्तार र स्तरोन्नतिका लागि सबै पक्षको सहयोग आवश्यक रहेको कलेजका प्रीन्सिपल धरनी  धर अधिकारीले बताए।