धनगढीमाईद्वारा मोतिया बिन्दुको सफल उपचार पछि मेडिकल टिमलाई विदाई

नेपाल पोष्ट दैनिक ५ फाल्गुन । तिलगंगा आँखा प्रतिष्ठान र धनगढीमाई नगरपालिकाको सहकार्यमा गत माघ २५ गते देखि नगरको १ देखि १४ वडासम्म समुदाय स्तरमा संचालित आँखा शिविरबाट स्क्रिनिङ गरी पत्ता लगाएका ५३५ मोतिया बिन्दुको बिरामी मध्ये ५२४ जनाको सफल अप्रेशन पछि नगर वासीमा खुशीयाली छाएको छ ।
नगरका विभिन्न वडाहरुमा संचालित आँखा शिविरबाट स्थानिय लाभाञ्चित हुँदै करिब करिब ७ हजारले आफ्ना आँखाको निःशुल्क चेक जाँच गराउन सफल भएका छन ।
घर आगनमा आँखाको निःशुल्क जाँचको बातावरण संचालित भएपछि गाउँघरमा दबिएर रहेका र कतिपय अवस्थामा आर्थिक अभावले उपचारबाट वञ्चित भएका आम मानिसको आँखा जाँच धनगढीमाई नगरपालिकाले आफनै पहलमा गराएर मोतिया बिन्दुको अप्रेसनको लागि बातावरण मिलाएको थियो ।
आर्थिक अभावले आँखाको उपचार गराउन नसकेका करिब ५२४ जनाको सफल उपचार सम्पन्न भएको छ ।
फाल्गुन २ गतेदेखि धनगढीमाई नगरपालिकाको प्रशासनिक भवनमा संचालित सर्जिकल सहितको निःशुल्क अप्रेशन लगातार तीन दिनसम्म संचालित अप्रेशन कार्यक्रम औपचारिक रूपमा सकिएपछि सर्जिकल सहितको निःशुल्क अप्रेशन सेवामा खटिएका डाक्टरहरु इन्दिरा पौडेल , किया वैध र कृपा लोप्चन सहितको टिमलाई विदाई गरिएको छ ।
विदाई कार्यक्रममा मेयर शिवशंकर महतो, उपमेयर संगिता कुमारी चौधरी , वाडा अध्यक्षज्युहरु सूर्यनारायण यादव , हमिद मिया , वीरेन्द्र शाह, ओम यादव , रामभरोस महतो, प्रकाश योञ्जन , सूर्यमान तामाङ लगाएत स्वास्थ्य साखा प्रमुख विशेश्वर प्रसाद यादव , जिन्सी साखा प्रमुख सम्पैत यादव , स्वास्थ्यकर्मी नगर प्रहरी लगायतको उपस्थितिमा विदाई गरिएको थियो ।
अप्रेशन गरिएका बिरामीहरुको आँखामा औषधी राख्ने काम स्थानिय जनप्रतिनिधिहरुबाट गरिँदै आएको थियो ।
बिरामी आराम कक्षमा मेयर शिवशंकर महतो लगाएत सबै जनप्रतिनिधिहरुले पटक पटक हौशला प्रदान गर्दै आउनु भएको थियो ।
लागातार तीन दिनसम्म चलेको उक्त अप्रेशन कार्यक्रममा तिलगंगा आँखा प्रतिष्ठानका डाक्टर कृष्ण मोहन श्रेष्ठ लगायत २२ जना मेडिकल टिम सक्रिय रहँदै आएको थियो ।