काठमाडौ ७ असोज । नेपाल कम्युनिस्ट पार्टी (नेकपा) ले सांगठनिक एकीकरणका बाँकी कामलाई पूरा गर्ने जिम्मा दुई अध्यक्षलाई दिएको छ ।
एकीकरणका बाँकी काम सक्ने योजना १० दिनभित्र बनाउन अध्यक्षद्वय केपी शर्मा ओली र पुष्पकमल दाहाल प्रचण्डका साथै महासचिव विष्णु पौडेललाई जिम्मेवारी दिने सहमति हिजोको नेकपा सचिवालय बैठकले गरेको हो ।
फेरि सचिवालयमा छलफल गरेर निष्कर्षमा पुग्ने तय भएको पार्टी प्रवक्ता नारायणकाजी श्रेष्ठले जानकारी दिनुभयो । बैठकले अहिलेसम्म संवैधानिक आयोगमा रिक्त रहेका पदपूर्तिका साथै राजनीतिक नियुक्तिको काम पनि छिटो गरिसक्न प्रधानमन्त्रीलाई सुझाव दिएको प्रवक्ता श्रेष्ठले बताउनुभयो ।बाँकी रहेका विविध एजेन्डामा २–३ दिन भित्र बैठक बसेर छलफल र निर्णय गर्ने प्रवक्ता श्रेष्ठले बताउनुभयो ।
प्रवक्ता श्रेष्ठले पार्टी उपाध्यक्ष बामदेव गौतमलाई राष्ट्रियसभामा मनोनयन गरिएकोमा सर्वोच्चमा रिट परेको विषयमा सरकारलाई सर्वोच्चबाट जानकारी आइनसकेको बताउनुभयो ।
औपचारिक जानकारी आएपछि कसरी अघि बढ्ने भन्नेमा आवश्यक छलफल र निर्णय लिइने उहाँको भनाइ थियो ।
