सप्तरी सम्वादाता १७ अषाढ । सप्तरीमा एक महिलालाई उनकै भतिजाले कथित बोक्सीको आरोप लगाएर पटक–पटक कुटपिट गर्दै आएका छन् ।
कुटपिट गर्ने उनका भतिजा नेपाल प्रहरीका हबल्दार हुन् ।
जिल्लाको डाक्नेश्वरी नगरपालिका ९ पत्थरगाडा निवासी ५३ बर्षीया जशोधियादेवी यादवलाई उनका भतिजा प्रहरी हबल्दार कमलदेव यादवले बोक्सीको आरोपमा पटक–पटक कुटपिट गर्दै आएका हुन् ।
पीडित महिलाले सदरमुकाम राजविराजमा सोमबार पत्रकार सम्मेलन गरी कुटपिटबारे जानकारी गराएकी हुन् ।
‘एक, दुई पटक मात्र होइन, धेरै पटक आफूलाई कुटपिट गर्दै आएका छन् कमलदेवले’ उनले भने, “पछिल्लो पटक शनिबार कुटपिट गरिरहँदा बचाउन आएकी आफ्नी छोरीलाई समेत उनले कुटपिट गरेका छन् ।
” छोरा वैदेशिक रोजगारमा रहँदा आफू बुहारीसँगै बस्दै आएको बताउँदै जशोधियादेवीले भनिन्, “काठमाडौंमा कार्यरत कमलदेव जहिल्यै घर आउँदा आफूलाई बोक्सीको आरोप लगाउँदै कुटपिट गर्दै आएका छन् ।
कमलदेवले गरेको कुटपिट सम्बन्धमा स्थानीय प्रहरीदेखि जिल्ला प्रहरी कार्यालयसम्म निवेदन दिँदा समेत प्रहरीले निवेदन दर्ता नगरेको उनले पत्रकार सम्मेलनमा बताइन् ।
जिल्ला प्रहरी कार्यालय, सप्तरीका डिएसपी भावेश रिमालले भने घट्नाको छानबन भइरहेको र यस सम्बन्धमा बुझ्नका लागि दुबै पक्षलाई बोलाइएको जानकारी दिएका छन् ।
