जनप्रतिनिधी, कर्मचारी र व्यवसायीको मिलेमत्तोमा भुत्तानीको लेनदेन

लहान ३० चैत। सिरहाको कल्याणपुर स्थित दुर्गा मन्दिरमा लाइट जडानको कार्य सम्पन्न नै नगरी भुक्तानी लिएको जनगुनासो रहेको छ ।
काम नै नगरी जनप्रतिनिधी, कर्मचारी र व्यवसायीको मिलेमत्तोमा भुक्तानी लिने र दिने स्थानीय बासीको गुनासो रहेको छ ।सिरहाको कल्याणपुर नगरपालिकामा कर्मचारी, जनप्रतिनिधी र व्यवसायीको मिलोमत्तोमा कामै नगरी लहान ३ का अमित सप्लायर्सले करिव ८ लाख भुक्तानी लिएको पाइएको छ।
नगरपालिकाले आर्थिक वर्ष २०८२÷०८३ अन्तर्गत उक्त कार्यका लागि १० लाख रुपैयाँ विनियोजन गरेको थियो। सोही योजना अन्तर्गत लहान ३ का अमित सप्लायर्ससँग २०८२÷०६÷२९ गते सम्झौता गरिएको थियो।

सम्झौताअनुसार सप्लायर्सले लाइट जडानसँगै फ्लड लाइट, एल इडी बल्ब, प्रोजेक्टर बत्ती, नेटवर्किङ सामग्री लगायतका विद्युतीय सामग्री उपलब्ध तथा जडान गराउने जिम्मा लिएको थियो। तर मन्दिरमा कुनै कामै नगरी ७ लाख ९१ हजार ३७४ रुपैयाँ भुक्तानी दिएको छ।

काम नै नगरी जनप्रतिनिधी, कर्मचारी र व्यवसायीको मिलेमत्तोमा भुक्तानी लिनु दिनु सिधै भ्रष्टाचार भएको भन्दै स्थानीयले कार्वाहीको माँग गरेका छन्। स्थानीय विजय कुमार साहले, ‘यसरी काम नगरी रकम भुक्तानी दिनु दिनु नीतिगत भ्रष्टाचार हो, यसकार्यमा संलग्न दोषीहरुमाथि कारबाही गरिनु पर्छ।’

काम नै नसकी हतार–हतार भुक्तानी दिनुले पनि कमिशनको खेल भएको भन्ने प्रष्ट भएको उनको भनाई छ।

अर्का स्थानीय सितल प्रसाद साहले सूचना अधिकार प्रयोग गरी कागजात माँग गरेपछि आफूहरुले कामै नगरी भुक्तानी दिएको जानकारी पाएको बताए। उनले भने, ‘हामीले कामै नगरी भुक्तानी भएको भन्ने सूचना पाएपछि पुष्टिका लागि सूचना माँग गर्यौं, त्यसपछि हामीले काम नै नगरी भुक्तानी भएको भन्ने थाहापायौं। यो सरासर गलत हो। यस कार्यमा संलग्न सवैलाई कार्वाही हुनुपर्छ।’

त्यसैगरी, अर्का स्थानीय सतेन्द्र यादवले पनि मन्दिरमा कुनै काम नभएको अवस्थामा सबैको मिलेमतोमा भुक्तानी गरिएको आशंका व्यक्त गर्दै छानबिन र कारबाहीको माँग गरे।

यता, कल्याणपुर नगरपालिका ११ का अध्यक्ष प्रमेश्वर साहले नगर स्तरिय योजना भएको हुनाले वडाबाट कार्य सम्पन्नताको सिफारिस आवश्यकता नभएको कारण नलिएको हुनसक्ने बताए। नगरबाटै सवै कार्य भएको अध्यक्ष साहले बताए। यस विषयमा आफूलाई धेरै जानकारी नरहेकोसमेत सुनाए।

यस विषयमा प्रमुख प्रशासकीय अधिकृत सुजित कुमार यादवलाई पटक–पटक फोन गर्दा वहाँको फोन उठेन्न।

कार्यवाहेक मेयर रेखा यादबलाई सम्पर्क गर्दा आफू एउटा छलफलमा रहेको हुनाले पछि फोन गर्छु भन्दै फोन काटे। पछि मेयर यादबलाई पटक–पटक फोन गर्दा वहाँले फोन काटी रहे, तर फोन उठाएन्न।