शम्भु चौधरी, लहान २७ माघ । सिरहा निर्वाचन क्षेत्र १ का जनमत पार्टीका उम्मेदवार रामस्वरूप चौधरी यतिबेला जनता रिझाउन घरदैलो तथा कार्यकर्ता भेटघाट कार्यक्रममा व्यस्त रहेका छन्। चुनाव लक्षित अभियान अन्तर्गत चौधरी आफ्ना नेताकार्यकर्ता तथा समर्थकसहित गाउँ–गाउँ पुगेर मतदातासँग प्रत्यक्ष भेटघाट गरिरहेका छन्।
घरदैलो तथा कार्यकर्ता भेटघाट कार्यक्रम अन्तरर्गत आज लक्ष्मीपुर पतारी गाउँपालिका २ पर्सा पोखरभिण्डा गाउँमा रहेको थियो ।
घरदैलो अभियानका क्रममा उनले स्थानीय बासिन्दाका समस्या, सुझाव र अपेक्षाहरू सुन्दै जनमत पार्टीका नीति, योजना तथा विकासका प्रतिबद्धताबारे जानकारी गराएका थिए। उनले जनताको विश्वास र साथ नै आफ्नो मुख्य शक्ति भएको उल्लेख गर्दै सामाजिक न्याय, सुशासन र क्षेत्रीय विकासलाई प्राथमिकतामा राखेर काम गर्ने प्रतिवद्धता व्यक्त गरे।
कार्यक्रममा सहभागी नेताहरूले यसपटक जनमत पार्टीलाई मजबुत समर्थन गर्न आग्रह गर्दै परिवर्तनका लागि नयाँ नेतृत्व आवश्यक रहेको धारणा राखेका थिए। स्थानीय कार्यकर्ताहरूको उल्लेख्य सहभागिताले अभियान थप उत्साहजनक बनेको जनाइएको छ। जनमत पार्टीले क्षेत्रभरि यस्तै घरदैलो तथा अन्तरक्रिया कार्यक्रमलाई निरन्तरता दिने जनमत पार्टीका नेता श्याम सिंहले बताए।
