लहान १२ को नवनिर्मित वडा कार्यालय र स्वास्थ्य चौकी उदघाटन

शम्भु चौधरी लहान २७ असार । लहान नगरपालिका–१२ मा नवनिर्मित स्वास्थ्य चौकीको उद्घाटनसँगै स्थानीयवासीमा खुशि छाएको छ। केही वर्षदेखि लहान नगरपालिकामा शिक्षा तथा स्वास्थ्य क्षेत्रमा उल्लेखनीय सुधार देखिएको छ।
स्वास्थ्य चौकीको उद्घाटन कार्यक्रममा पत्रकार महासङ्घका सभापतिले अब सामान्य बिरामीदेखि आकस्मिक सेवासमेत यही स्वास्थ चौकिबाट पाइने भएकाले अन्यत्र जानुपर्ने बाध्यता अन्त्य भएको बताए। पूर्व–पश्चिम राजमार्गकै छेउमा पर्ने यो स्वास्थ्य चौकीले सडक दुर्घटना तथा आकस्मिक अवस्थाहरूमा प्रभावकारी भूमिका खेल्ने अपेक्षा गरिएको छ।

हालसम्म नगरपालिकाले १३ वटा वडा कार्यालयका लागि आफ्नै भवन निर्माण गरिसकेको छ, जसमा जनताको सेवा सुचारु छ। बाँकी रहेका ५ वटा वडाका लागि आगामी आर्थिक वर्षमा भवन निर्माण गरिने योजना रहेको मेयर चौधरीले जानकारी दिए।
शिक्षा क्षेत्रमा प्रविधिमैत्री र नविनतम अभ्यासलाई आत्मसात गर्ने क्रममा लहान नगरपालिका १२ स्थित श्री माध्यमिक विद्यालय, पडरिया थारुटोलमा तीन वटा कक्षामा ७५ इन्चको इन्टरएक्टिभ बोर्ड जडान गरी समुद्घाटन गरिएको छ।

उक्त इन्टरएक्टिभ बोर्डहरूको समुद्घाटन लहान नगरपालिकाका नगर प्रमुख महेश प्रसाद चौधरीको प्रमुख आतिथ्यमा सम्पन्न भएको हो। समुद्घाटन समारोहलाई सम्बोधन गर्दै नगर प्रमुख महेश चौधरीले लहान नगरपालिकाले गुणस्तरीय शिक्षालाई सर्वोच्च प्राथमिकतामा राखेको उल्लेख गर्दै आधुनिक शिक्षण उपकरण र प्रविधिको प्रयोगमार्फत विद्यार्थीहरूको सिकाइ क्षमतामा गुणात्मक सुधार ल्याउने लक्ष्य रहेको बताए।

कार्यक्रममा विभिन्न वक्ताहरूले प्रविधिको प्रयोगले वर्तमान शैक्षिक चुनौतीहरू समाधान गर्न सकिने तथा ग्रामीण क्षेत्रका विद्यालयहरूमा समेत यस्तो प्रविधिको पहुँच पुर्याउनु आजको आवश्यकता भएको धारणा राखे। उक्त कार्यक्रम विद्यालय परिवारको समन्वयमा भव्य र शालीन रूपमा सम्पन्न भएको थियो। तीनवटा ७५ इन्चका इन्टरएक्टिभ बोर्डहरूको प्रयोग आगामी दिनमा प्रभावशाली शिक्षा विस्तारतर्फ महत्वपूर्ण उपलब्धि सावित हुने विश्वास गरिएको छ।
कार्यक्रमका विशिष्ट अतिथि प्रमुख प्रशासकीय अधिकृत जयकान्त झा थिए भने वडाध्यक्ष बद्री नारायण चौधरी, शिक्षा अधिकृत अमिरी यादव, कार्यक्रम संयोजक महेश्वरी चौधरी, विद्यालय व्यवस्थापन समिति अध्यक्ष छेदीलाल चौधरी तथा समितिका सम्पूर्ण पदाधिकारी, शिक्षक(शिक्षिका, पत्रकार, समाजसेवी, बुद्धिजीवी र स्थानीय जनप्रतिनिधिहरूको उल्लेखनीय उपस्थिति रहेको थियो।