सिरहा , भदौ २ । सिरहाको लाहान २४ घर भई प्रहरी कार्यलय सहयोगीमा जागीर पाएका जवान कैलाश रायलाई गैरकानूनी तवरबाट प्रहरी प्रशासनले जागीरबाट हटाएको छ ।
अत्यन्त आर्थिक कमजोर परिवारका रायले आफ्ना प्रहरी हाकिमलाई घरमा बहिनी आँखाको बिरामी भएको भन्दै १० दिनको मौखिक बिदा मिलाएर घर फर्केका रायले आफू कार्यरत कार्यालयमा पुग्दा उनले आफ्नो जागिर गुमेको पाए ।
प्रहरी ऐन अनुसार लगातार १५ दिनसम्म कार्यालयमा अनुपस्थित भएको खण्डमा निलम्बन गर्न सकिने ब्यबस्था हुँदाहुँदै उनलाई हटाउनुले प्रहरी प्रशासन आफैले कानुनको धज्जी उडाएको सहजै अनुमान गर्न सकिन्छ । लगातार ३० दिनसम्म कार्यालयमा अनुपस्थित भएको खण्डमा बर्खास्तको प्रक्रिया शुरू हुने ब्यबस्था छ । तर एकाएक कानुन विपरीत उनलाई हटाउनु कुनै हिसाबले न्यायपूर्ण मानिन्न ।
यता रायका बहिनीहरु पूजा कुमारी राय र करिना रायको आँखाको ज्योति गुमेको अवस्था छ । गम्भीर आपतमा परेका राय बहिनीहरुको उपचारको लागि हाकिमसंग बिदा त मागे तर प्रहरी प्रशासनले उनको वास्तविकता नबुझेर विदा मिलाएन त्यसपछि वैकल्पिक बाटो रोजेर हाकिमसंग विनम्र अनुरोध गर्दै मौखिक रूपमा १० दिनको बिदा मिलाएर बहिनीहरुको उपचारको लागि घर आए । अस्पतालमा भर्ना भएकी बहिनीहरुको उपचारमा संलग्न डाक्टर अनुसार अब उप्रान्त आँखाको ज्योति नफर्किने बताए पछि दुखमा परेका राय परिवार घर फर्किएका थिए ।
