सप्तरी २ ४ कार्तिक। सप्तरीको सुरुङ्गा न.पा. ९, टिकुलियामा संचालन भएको वडा स्तरीय भलिबल प्रतियोगिताको फाइनलमा बिरनगर प्रगतिशील क्लव विजयी भएको छ ।
टिकुलिया स्थित केशब स्मारक मा.वि.को प्राङ्गणमा आज भएको फाइनलमा सुरुङ्गा–४ बिरनगरले सुरुङ्गा–९ टिकुलियालाई ३–० को सेटमा पराजीत गरी प्रथम भएको हो ।
बिरनगरले टिकुलियालाई २४–२२, २४–१९ र २४–२३ को सेटमा पराजीत गरेको हो ।
बिजेता बिरनगरले टिकुलिया बी टिम र उपविजेता टिकुलियाले कुशहा बी टिमलाई पराजीत गरी फाइनलमा भिडेका थिए । तिहारको अवसरमा डिहबार बाबा बाल क्लवले आयोजना गरेको वडा स्तरीय भलिवल प्रतियोगितामा सुरुङ्गा न.पा. को विभिन्न वडाबाट जम्मा १३ ओटा टिमको सहभागिता रहेको जानकारी आयोजक संस्थाका बिरेन्द्र चौधरीले दिएका छन् ।
स्वास्थ्यका लागि खेलकुद, राष्ट्रका लागि खेलकुद भन्ने उद्देश्यका साथ आयोजित भलिबल प्रतियोगिताबाट शारीरिक फाइदा हुनुका साथै मनोरंजनको अवसर सृजना भएको भन्दै स्थानीयवासीले यस किसिमको खेलकुद प्रतियोगिता हुनु राम्रो रहेको बताएका थिए ।
प्रतियोगिताको समापन कार्यक्रममा सुरुङ्गा न.पा.का नगरप्रमुख मुक्तिनाथ चौधरी, सामाजिक विकास शाखा संयोजक देबेन्द्र प्रसाद चौधरी, शिक्षा शाखा प्रमुख हिरालाल राना, समाजसेवी एवम् नेतृ गिता चौधरी लगायतका व्यक्तित्वहरु मार्फत प्रतियोगी टिम र खेलाडीहरुलाई पुरस्कार, ट्रफी तथा प्रमाणपत्र वितरण गरिएको थियो ।
