उदयपुर १९ कात्तिक । उदयपुरको त्रियुगा नगरपालिका–१२ डिएमगेटस्थित ऊँ रौतारानी हाउस एण्ड सप्लार्यस तथा रिकन्डिसन हाउसमा लक्ष्मीपूजाको रात बिद्युत सर्ट भई आगलागी हुँदा करोडौंको धनमाल जलेर नष्ट भएको छ । त्रियुगा नगरपालिका–१२ डिएमग्रेटस्थित किस्मत अलीको घर भाडामा लिई टेकबहादुर दाहाल र राजकुमार राउतको पसलमा आगलागी हुँदा पसलमा रहेको सम्पूर्ण सामाग्री जलेर नष्ट भएको हो ।
आगलागीबाट ३५ वटा मोटर साईकल, ३ वटा ल्यापटप, सिसि क्यामेरा, प्रिन्टर, मोटर पार्टसका सामान, मेसिन लगायतका करिब १ करोड ५० लाख भन्दा बढीको क्षति भएको सञ्चालक टेकबहादुर दाहालले जानकारी दिए ।
साँझ दिपावली गरेर हिडेका उनीहरुको पसलमा एक्कासी बिद्युत सर्ट भई आगलागी भएको प्रहरीले बताएको छ । राती अचानक आगलागी भएपछि स्थानीयबासीले प्रहरीलाई खबर गरेका थिए । स्थानीयबासी, प्रहरी, बारुद यन्त्रको सहयोगमा ३ घण्टापछि आगो नियन्त्रणमा लिएको बताइएको छ ।
प्रहरीले क्षतिको विवरण र घटनाबारे अनुसन्धान भईरहेको जनाएको छ ।
