लहान २ कार्तिक । सिरहाको लहानमा थारु भाषा विषयक छलफल कार्यक्रम सम्पन्न भएको छ । थारु कल्याणकारिणी सभा सिरहाको आयोजना लहान स्थित माडवारी सेवा सदनमा थारु,थारु भाषा विषयमा छलफल एवं संवाद कार्यक्रम भएको हो ।
भाषा आयोगले प्रदेश २ मा थारु भाषा बाहुल्यता भए पनि सरकारी कामकाजको भाषा “थारु भाषा”लाई नराखिएको प्रति थारु समुदाय चिन्तित भएका छन् । राज्यले थारु समुदायमाथि विभेद गरेर प्रदेश १ र २ मा थारु भाषालाई कामकाजी भाषामा नराखिएकोले थारुहरु एकजुट भएर राज्यलाई दवाव सिर्जना गर्ने उद्येश्यले सिरहा,सप्तरी र उदयपुरका थारु अगुवा,समाजसेवी, थारु जनप्रतिनिधि , थारु भाषाका विद्धान वर्ग वीच छलफल भएका छन् ।
सिरहा क्षेत्र १ का संघीय सदस्य माननीय पद्म नारायण चौधरीका अनुसार थारु भाषालाई कामकाजी भाषा बनाउन विद्धान वर्गले घनीभूत रुपमा बहस पैरवी गर्नु पर्छ साथै भाषा कायम गराउने आधारहरु तयार गरेर अघि बढनु पर्छ ।
थारु भाषाका शब्द कोष, व्याकरण र पाठ्यक्रम विकास, साहित्य लेखनी साथै पत्रपत्रिका लगायत थारु समुदाय लगायत थारु समाजमा बसोवास गर्ने अन्य समुदायले पनि थारु भाषा बोल्नेको तथ्यांक प्रमाण सहित राज्यसँग बहस गर्न सके ढिलै भएपनि थारु भाषा पनि अन्य भाषा सरह सरकारी कामकाजको भाषामा राज्य सूचिकृत गर्न तयार हुनेछ ।
यसैगरी तत्कालीन समय २०४८ सालतिर नै राज्यले थारु भाषीहरुलाई २ कलस्टरमा विभाजित गरिदिएको छ । रेडियो नेपालको धनकुटा प्रसारणबाट मोरङको थारुहरुले बोल्ने भाषा र पश्चिमको सुर्खेत प्रसारणबाट दाङ देखुरी तर्फको भाषा प्रसारित गराएर नेपालका थारु भाषीहरुलाई अलग अलग कलस्टरमा विभाजित गरिएकोले वर्तमानमा यस्तो समस्या सिर्जना भएको समेत बताउनु भयो । यसै गरी उहाँले थारु भाषाको एक रुपता कायम गर्न भाषाको व्याकरण र शब्दकोष निर्माण गरी एकीकृत गर्ने काम भाषा विज्ञहरुले गर्नु नितान्त आवश्यक भएको औल्याउनु भयो ।
