काठमाडौं २५ चैत। काभ्रे जिल्लामा रहेको धुलिखेल अस्पतालमा कोरोना भाइरस परिक्षण शुरु भएको छ । आज पहिलो दिन ११ जनाको स्वाब परिक्षण गरेको छ । धुलिखेल अस्पतालले कोरोना भाइरस परीक्षण सुरु गरेको दिन नै ११ जनाको स्वाब परीक्षण गरेको हो । स्वाब परिक्षण केही धुलिखेलमा क्वारेनटाइन, केही मण्डनदेउपुरमा क्वारेनटाइन र केही विदेशबाट आई सेल्फ क्वारेनटाइनमा बसेका व्यक्तिहरूको कोरोना संक्रमण परीक्षणका लागि स्वाब निकालिएको जिल्ला स्वास्थ्य कार्यालय, काभ्रे प्रमुख नरेन्द्र कुमार झाले जानकारी दिएका छन् । परिक्षण गरेको तीन–चार घन्टामै रिपोर्ट आउने भएपनि स्वास्थ्य मन्त्रालयमा पठाएर कोरोना संंक्रमण पाएमा मन्त्रालयले नै सार्वजनिक गर्ने प्रमुख डा. झाले जानकारी दिए ।
परिक्षण हप्तामा दुई दिन
कोरोना संक्रमण परीक्षण हप्तामा दुई दिन मात्र गर्ने अस्पतालले जनाएको छ । प्रत्येक हप्ताको आइतबार र बुधबार मात्र परीक्षण गर्ने छ । डा. झाले भने,‘हाललाई शंका लागेको व्यक्ति कम भएकाले हप्तामा दुई दिन मात्र परीक्षणको लागि छुट्याएको हो । धुलिखेल अस्पतामा एक दिनमा ९० जनासम्मको कोरोना परीक्षण गर्न सक्ने क्षमता रहेको अस्पतालले जनाएको छ । कोरोना भाइरस परीक्षण सेवालाई उपत्यकाबाहिर पनि सञ्चालन गर्ने सरकारको निर्णय अनुसार धुलिखेल अस्पतालमा परिक्षण गर्ने निर्णय गरेको थियो । अन्य स्थानमा पहिले नै परीक्षण सुरु गरे पनि धुलिखेल अस्पतालमा भने किट उपलब्ध नभएकाले सुरु हुन सकेको थिएन । धुलिखेल अस्पताललाई शुक्रबार मात्र टेस्ट किट उपलब्ध भएपछि आइतबारबाट कोरोना भाइरस परीक्षण सुरु गरेका छौं ।’ डा. झाले भने,‘धुलिखेल अस्पतालको विशेष सक्रियतामा किट ल्याउन सफल भएका हौं ।
