शम्भु चौधरी, लहान १० कार्तिक । लहान २२ मा श्री बर्छवा सामुदायिक युवा मञ्चको आयोजना तथा सगरमाथा चौधरी आँखा अस्पताल, लहानको प्राविधिक सहयोगमा एकदिने आँखा शिविर सोमबार सम्पन्न भएकोछ ।
स्थानीयवासीलाई सहज रूपमा आँखा उपचार सेवा उपलब्ध गराउने तथा आँखा सम्बन्धी समस्याको समयमै पहिचान र उपचारमा सहयोग पुर्याउने उद्देश्यले शिविर आयोजना गरिएको आयोजक समितिले बताएका छन ।
शिविरमा स्थानीयवासीको आँखा परीक्षण गर्नुका साथै आँखासम्बन्धी विभिन्न समस्याबारे आवश्यक परामर्श प्रदान गरिएको थियो। आँखा स्वास्थ्यप्रति जनचेतना अभिवृद्धि गर्ने र उपचारका लागि टाढा जानुपर्ने बाध्यता कम गर्ने उद्देश्यले आयोजित शिविरबाट स्थानीय बासिन्दाले लाभ लिने अवसर पाएका छन्।
श्री आधारभुत विधालय बर्छवामा संंचालन भएको शिविरमा करीब ३ सय बिरामीले आफ्नो अँखा जाँच गराएर लाभान्वित भएका छन् र ती मध्ये करीब १ सय जना मोतियाबिन्दुका बिरामीले निशुल्क अपरेसन उपचार सेवा पाउनेछन्।
आँखा मानव शरीरको महत्त्वपूर्ण अंग भएकाले यसको नियमित परीक्षण र समयमै उपचार आवश्यक रहेको स्वास्थ्यकर्मीहरूले बताएका थिए। आँखामा देखिने सामान्य समस्यालाई बेवास्ता गर्दा भविष्यमा गम्भीर समस्या उत्पन्न हुन सक्ने भएकाले नियमित रूपमा आँखा परीक्षण गराउनुपर्नेमा उनीहरूले जोड दिएका थिए।
ग्रामीण तथा स्थानीय क्षेत्रमा स्वास्थ्य सेवाको पहुँच विस्तार गर्न यस्ता स्वास्थ्य शिविरले महत्त्वपूर्ण भूमिका खेल्ने आयोजकको विश्वास छ। विशेषगरी आर्थिक तथा भौगोलिक कारणले नियमित स्वास्थ्य परीक्षण गराउन नसक्ने नागरिकका लागि यस्ता शिविर प्रभावकारी हुने अपेक्षा गरिएको छ।
श्री बर्छवा सामुदायिक युवा मञ्चले सामाजिक उत्तरदायित्वअन्तर्गत स्थानीयवासीको स्वास्थ्य सेवामा पहुँच बढाउने उद्देश्यले शिविर आयोजना गरेको जनाएको छ। शिविर सफल बनाउन प्राविधिक सहयोग उपलब्ध गराएको सगरमाथा चौधरी आँखा अस्पताल, लहान तथा सहयोग गर्ने सम्पूर्ण व्यक्ति र संस्थाप्रति आयोजकले आभार व्यक्त गरेको छ।
स्थानीयस्तरमा स्वास्थ्यसम्बन्धी जनचेतना अभिवृद्धि गर्नुका साथै नागरिकलाई आधारभूत स्वास्थ्य सेवासँग जोड्न यस्ता कार्यक्रमलाई आगामी दिनमा समेत निरन्तरता दिनुपर्ने आवश्यकता औँल्याइएको छ।
