सुनसरी सम्वादाता ११ साउन । सुनसरीको देवानगञ्ज गाउँपालिका–३, कप्तानगञ्जमा सोमबारी पूजाको तयारीका क्रममा दुई समुदायबीच विवाद भएको बताइएको छ। समान्य भनाभन पछि विवाद केहि समय पछि झडपमा परिणत भएको थियो । झडपमा एक जनाको मृत्यु भएको छ भने प्रहरी सहित १६ जना घाइते भएका छन्। मृत्यु हुनेमा देवानगञ्ज–३ का २४ वर्षीय ओमप्रकाश मेहता रहेको छ । घटनापछि थप तनाव फैलिन नदिन जिल्ला प्रशासन कार्यालयले कप्तानगञ्ज र आसपासका क्षेत्रमा कर्फ्यु आदेश जारी गरेको छ।
दुई समूहबीच सुरु भएको सामान्य भनाभन केहीबेरमै कुटाकुट, ढुंगामुढा, आगजनी र तोडफोडमा परिणत भएको प्रहरीले जनाएको छ। स्थिति नियन्त्रण बाहिर गएपछि प्रहरीले लाठीचार्ज, अश्रुग्यास र हवाई फायर गरे पनि अवस्था नियन्त्रणमा नआए पछि गोली चलाउनुपरेको सुनसरी प्रहरीका निमित्त प्रमुख डीएसपी चन्द्रबहादुर खड्काले बताए।
जिल्ला प्रशासन कार्यालयले सोमबारदेखि कप्तानगञ्ज क्षेत्रमा कर्फ्यु आदेश जारी गर्दै सर्वसाधारणलाई अत्यावश्यक कामबाहेक घरबाहिर ननिस्कन आग्रह गरेको छ। प्रहरीले घटनाको वास्तविक कारण, गोली चलाउनुपरेको परिस्थिति तथा आगजनी, तोडफोड र अन्य क्षतिको विस्तृत अनुसन्धान सुरु गरेको जनाएको छ।
