शम्भु चौधरी लहान ८ जेठ । लहान नगरपालिका १३ घलेटोल मुसहर समुदायका अतिविपन्न २० घरपरिवारलाई नयाँ सुरक्षित घर हस्तान्तरण गरिएको छ। लहान नगरपालिका, ह्याविट्याट फर ह्युमानिटी नेपाल र भवानी एकीकृत विकास केन्द्र धनगढीमाई न पा २ सिरहाको त्रिपक्षीय साझेदारीमा निर्माण भएका ती घर आज एक कार्यक्रमका बीच हस्तान्तरण गरिएको हो।
आर्थिक वर्ष २०८१।८२ को ‘विपन्न परिवारका लागि सुरक्षित आवास निर्माण कार्यक्रम’ अन्तर्गत लहान नगरपालिकाको रु ६९ लाख ४ हजार र ह्याविट्याट फर ह्युमानिटी नेपालको रु १६ लाख ६६ हजारको आर्थिक लगानीमा ती आवास निर्माण गरिएका हुन् । घर निर्माणमा भवानी एकीकृत विकास केन्द्रको प्राविधिक सहयोग रहेको थियो भने लाभग्राही परिवारले आफैँ करीब एक लाख बराबरको श्रमदान गरेको भवानीका कर्मचारी ज्ञानदिप चौधरीले बताए।
नवनिर्मित प्रत्येक घरमा दुईवटा कोठा, एक भान्सा कोठा, बरण्डा र शौचालयको व्यवस्था गरिएको छ । भवानी एकीकृत विकास केन्द्रका कार्यकारी निर्देशक सुजित चौधरीका अनुसार यी घरहरू भूकम्प प्रतिरोधी हुनुका साथै यिनीहरूको न्यूनतम आयु ३० वर्षभन्दा बढी भएको बताए।
नयाँ घरको चाबी हस्तान्तरण गर्दै लहान नगरपालिकाका नगरप्रमुख महेशप्रसाद चौधरीले नगरभित्रका कोही पनि विपन्न नागरिक घरविहीन हुन नपरोस् भन्ने उद्देश्यले स्थानीय सरकारले काम गरिरहेको बताए। हरेक विपन्न र भूमिहीन नागरिकको एउटा सुरक्षित र भरपर्दो घर होस् भन्ने सपना हुन्छ । स्थानीय सरकारको हैसियतले हामीले उहाँहरूको त्यही सपनालाई क्रमशः साकार पार्दै लगेका छौँ । यो अभियान आगामी दिनमा पनि निरन्तर जारी रहने बताए ।
यस अघि लहानका १५, १२, २१, २२ र १३ मा गरी दुई सयभन्दा बढी सुरक्षित घर निर्माण गरेर लक्षित परिवारलाई हस्तान्तरण गरिसकिएको छ । विगत लामो समयदेखि आवासको क्षेत्रमा काम गरिरहेको ह्याविट्याट फर ह्युमानिटी नेपालका कार्यक्रम संयोजक नासिन श्रवणले संस्थाले सिरहामा सुरक्षित आवासका लागि निरन्तर सहकार्य गरिरहेको बताए । चालु आर्थिक वर्षभित्र नगरको वडा नं १३ मा थप १० घर, वडा नम्बर १५ मा सात घर र वडा नं १८ मा आठ घर निर्माण गरी हस्तान्तरण गर्ने योजना छ।
यसैबिच, वर्षौँदेखि फुसको कच्ची झुपडीमा कष्टकर जीवन बिताउँदै आएका घलेटोलका मुसहर परिवार आधुनिक र सुरक्षित पक्की घर पाएपछि हर्षित भएका छन्। नगरको यो काम सकारात्मक पहलका रूपमा रहेको स्थानीयले प्रतिक्रिया दिएका छन्।
