सिराहा २२ भदौ । सिरहाको लहान नगरपालिका १४ बस्तीपुर स्थित प्रदीप गिरीको आश्रममा प्रधानमन्त्री पुष्पकमल दाहाल प्रचण्ड आउने भएका छन् । भदौ २२ मा प्रदिप गिरीको आश्रम लहान –१४ मा प्रथम वार्षिकोत्सवको अवसरमा प्रधानमन्त्री दाहालद्वारा गिरीको पूर्णकदको शालिक अनावरण गर्ने कार्यक्रम रहेको छ ।
कार्यक्रमको तयारीको लागि लहान नगरपालिकाका मेयर, उपमेयर, प्रमुख जिल्ला अधिकारी लगायतका सुरक्षा निकायका प्रमुखहरुद्वारा स्थलगत निरीक्षण समेत गरेका छन् ।
प्रधानमन्त्री सवार हेलिकोप्टर स्थानीय बस्तीपुर माविको परिसरमा अवतरण गरिने भएको छ । प्रधानमन्त्री आउने भएपछि सिरहाका सुरक्षा निकायद्वारा स्थलगत निरीक्षण गरेका छन् ।
लहान–१४ को खुट्टी खोलाको छेउमा गिरी २०४६ सालपछि बस्दै आएको ठाउँ जसलाई प्रदिप गिरीको आश्रम भनेर चिनिन्छ । समाजवादी चिन्तनका नेता गिरी नेपाली राजनीति वृत्तमा सरल नेताको रूपमा चिनिन्छन् । घाँटीको क्यान्सरबाट पीडित गिरीको २०७९ भदौ ४ गते मेडिसिटी अस्पतालमा उपचारको क्रममा निधन भएको थियो ।
