शरद शर्मा मजगैया,साउन १७ दाङ । तुलसीपुर र घोराहीमा २ वटा रक्त संचार केन्द्र सञ्चालन रहेको दाङमा रगतको अभाव भने हुने गरेको छ ।
विरामीहरुलाई चाहेको बेला आबश्यक रगत पाउने अबस्था अझै हुन सकेको छैन । रक्त संचार केन्द्र दाङका अनुसार अझै २० प्रतिशत विरामीहरुले उनीहरुका आफ्न्तवाट नै रगत लिने गर्दछन ।
दैनिक १०÷१५ युनिट रगत आवश्यक पर्ने जिल्लामा मासिक सरदर ३ सय युनिट रगतको आवश्यकता पर्ने रक्त सञ्चार केन्द्रले जानकारी दिएको छ ।
तुलसीपुर र घोराहीका रक्त सञ्चारका लागि गत आर्थिक बर्ष २०७५÷०७६ मा २ हजार ९ सय ६० जनाले रक्तदान गरेका छन् ।
तुलसीपुरमा ६ सय ४४ युनिट रगत संकलन भएकोमा ६ सय ७३ युनिट रगत खपत भएको रक्त सञ्चार केन्द्र तुलसीपुरका नरेश चौधरीले जानकारी दिनुभयो
घोराहीमा २३ सय १६ संकलन भएको र त्यस मध्यमा २२ सय खपत भएको रक्त सञ्चार केन्द्र घोराहका प्रमुख दिलिप न्यौपाने बताउनुभयो ।
२३ सय १६ यु्निटमा १८ सय ८० युनिट पुरुषवाट र महिलावाट ४ सय ३६ युनिट संकलन भएको उहाँले बताउनुभयो ।
डाईलोसीस सेवा राप्ती प्रादेशीक अस्पताल तुलसीपुरमा शुरु भएको र दैनिक ६÷७ युनिट खपत हुने गरेको छ ।
रक्त संचार केन्द्र तुलसीपुरमा फ्रिज सानो क्षमता भएकाले ६० युनिट भन्दा बढी स्टक गर्न नमिल्ने भएकाले समस्या रहेको छ ।
दाङमा ८० प्रतिशतले रक्त संचारवाट रगत प्राप्त गर्ने गरेका रक्त सञ्चार केन्द्र घोराहका प्रमुख न्यौपानेले बताउनुभयो ।
जिल्लामा सबै भन्दा बढि ‘बि’ पोजेटिभ रगतको अभाव हुने घोराही ईञ्चार्ज न्यौपानेले बताउनुभयो ।
दाङमा सिकलसेलका विरामीहरु धेरै भएकाले पनि उनीहरुलाई ‘बि’ पोजेटिभ रगत आवश्यक पर्ने भएकाले त्यसको अभाव हुने उहाँले बताउनुभयो ।
घोराहीबाट राप्ती स्वास्थ्य विज्ञान प्रतिष्ठान, लमही अस्पताल र निजी दिपज्योति हस्पिटल, गोर्खा हस्पिटल लगायतका जिल्लाका अस्पतालहरुमा रगत खपत हुने गरेको छ ।
त्यसबाहेक जिल्लाबाहिर बुटवल र नेपालगंजका अस्पतालहरुमा समेत कहीले काहि माग भए बमोजीम रगत पठाउने गरीएको उहाले बताउनुभयो ।
तुलसीपुरमा राप्ती प्रादेशिक अस्पताल,राप्ती लाईफ केयर हस्पिटल र तुल्सी हस्पिटलमा रगत खपत हुने गरेको छ । तर तुलसीपुरमा रगतको अभाव भए घोराहीवाट ल्याउने र घोराहीमा अभाव भए तुलसीपुरवाट पठाउने गरेको तुलसीपुरका ईञ्चार्ज चौधरीले बताउनुभयो ।
‘बि’ पोजटिभ रगत दाङमा अभाव हुने भएकाले मागपुर्ती गर्न जेसीज, रोटरी र रोट्रयाक लगायतका संघसंस्थाहरुसंग समन्वय गरी ब्यवस्था मिलाउने गरीएको छ ।
अन्य रगत भन्दा ‘ए’ र ‘बि’ नेगेटिभ र पोजेटिभ रगतका कहिले काहीे समस्याले गर्दा अप्रेशन गर्दा समस्या हुने गरेको राप्ती प्रादेशिक अस्पताल तुलसीपुरका स्त्रि रोग विशेषज्ञ डाक्टर विनोद सिंहले बताउनुभयो ।
यदि जिल्लामा रगतको ब्यवस्था हुन नसके बिरामीलाई जिल्ला बाहिर रिफर गर्ने गरीएको डाक्टर सिंहले बताउनुभयो ।
पुरुषहरुले ३ महिनामा एक पटक र बर्षमा ४ पटक सम्म र महिलाहरुले बर्षमा ३ पटक ४ महिनाको एक पटक रक्तदान गर्न मिल्ने रक्त सञ्चार केन्द्रले जानकारी दिएको छ । रक्तदान गरेको ३५ दिन भित्र उक्त रगत प्रयोग गरी सक्नुपर्ने हुन्छ ।
