नगरपालिकाको नाम नै छिया छिया

शम्भु चौधरी, ७ मंसिर सिरहा । सिरहाको धनगढीमाई नगरपालिकामा प्रमुख नेतृत्व—मेयर, उपमेयर, प्रमुख प्रशासकीय अधिकृत, वडा अध्यक्षहरू, र कार्यपालिका सदस्यहरू आ आफ्नै खिचातानी र हठको अडानमा उभिएपछि नगरपालिकाको नाम नै छिया छिया भएका छन।
नगरपालिकामा सरोकारवालाहरुले आ आफ्नै किसिमको प्रेस विज्ञप्ति उपर प्रेस विज्ञप्ती र विवादका प्रभावका कारण जनताको समस्या समाधानमा कुनै ठोस कदम चालिएको छैन । विज्ञप्तिहरू प्रकाशनसँगै नगरवासीहरूमा असन्तोष र चासो बढ्दै गएको देखिन्छ ।
पत्रकार विनोद मणडल आफनो फेसबुक पेजमा लेख्नु हुन्छ, नगरपालिकाको नेतृत्वले व्यक्तिगत स्वार्थ र अधिकारको द्वन्द्वलाई प्राथमिकता दिएर आम जनताको हितलाई उपेक्षा गरिरहेको छ । यसै कारण, आधारभूत सेवा—जस्तै जन्मदर्ता, नागरिकताको सिफारिस, स्वास्थ्य सेवा, शिक्षाका लागि सिफारिस, र स्थानीय विकास निर्माणका कामहरू प्रभावित भएका छन् । आम सेवाहरू ठप्प भएपछि नगरवासीहरू आक्रोशित बनेका छन् । नगरपालिकामा आम जनता सडक संघर्षको तयारीमा करिब करिब जाने पक्का भइरहेको वुझिएको छ ।
नगरको विवाद तत्काल समाधान नभए नगरपालिकाको मूल कार्यालयमा धर्ना, प्रदर्शन र अन्य आन्दोलनका कार्यक्रम अघि बढाउने योजना रहेको स्थानिय नागरिकहरूले बताउँदै आएका छन । नगरपालिकाको नेतृत्व पक्षले आपसी विवाद समाधान गर्न कुनै ठोस पहल नगरेको भन्दै आलोचित बनेको छ । मेयर र उपमेयरबीचको संवादहीनता, कार्यपालिका सदस्यहरूबीचको विवाद, र प्रशासकीय अधिकृतको भूमिकालाई लिएर थप समस्या बल्झिएको छ ।
धनगढीमाई नगरपालिकाका स्थानीयवासीहरूले नेतृत्वलाई आपसी विवाद र किचलो अन्त्य गरी जनताको समस्या समाधानतर्फ ध्यान दिन आग्रह गरेका छन् । उनीहरूले नगरपालिकालाई राजनीतिक र व्यक्तिगत स्वार्थबाट माथि उठ्न र आम जनताको सेवामा केन्द्रित हुन चेतावनी दिएका छन् ।
यदि शीघ्र कदम चालिएन भने, सिरहाको धनगढीमाई नगरपालिका निकट भविष्यमा ठूलो नागरिक आन्दोलनको केन्द्र बन्न सक्ने देखिन्छ ।

त्यसैगरी धनगढीमाई नगरपालिकाका निवर्तमान नगर प्रमुख हरि नारायण चौधरी पनि आफनो समाजिक संजालमा लेख्नु भएको छ, स्थानीय सरकार सञ्चालनका क्रममा नगर प्रमुखले अभिभावकीय र समन्वयात्मक भूमिका निर्वाह गर्नुपर्ने हुन्छ। विविध विचार र पक्षहरूको संकेन्द्रित अभिव्यक्ति वा व्यवहार नै नेतृत्व हो, भन्ने कुरालाई नजर अन्दाज गर्दै आन्तरिक, अनौपचारिक गन्थनमन्थनका विषयहरूलाई गिजोलेर समस्याहरुलाई समाधान गर्नुको साटो तिललाई पहाड बनाउने प्रयास आफैमा खेद जनक छ र साथै जन अभिमत प्रतिको अपमान हो।
तसर्थ, जन अभिमतको सम्मान गर्दै जनचाहना पूरा गर्न स्थानीय सरकार सञ्चालनको मूल मन्त्र(समन्वय, सहकार्य र सह(अस्तित्वलाई आत्मसात गरी जनउत्तरदायीत्व, जवाफदेहिता र पारदर्शिता सुनिश्चित गर्दै सुलभ र गुणस्तरीय सेवा प्रवाह द्वारा सुसाशन, विकास र सामाजिक न्याय सहितको समृद्धि हासिल गर्न स्थानिय शासन पद्दतीलाई सुदृढ र संस्थागत गर्न नेतृत्वले अहम भुमिका खेल्नुपर्दछ। हिजोका दिनमा हामीले गरेका सकारात्मक अभ्यास पनि आज नजिरका रुपमा लिन सकिन्छ । सम्वाद, सहमति र सहकार्यको निम्ति सर्वपक्षिय समन्वयात्मक भूमिका निर्वाह गर्दै परिस्थितीलाई सामान्यीकरण गर्न नेतृत्वको गम्भीर ध्यानाकर्षण गराउन चाहन्छु ।
समाजिक संजालमा आएका अतिका सुझावहरुलाई अहिलेसम्म कुनै किसिमको नजर अंदाज नगरी कुन दुलोमा खिचडी पकाई भईरहेको छ बुझन गाहो भो यार ।