सिरहा,१८ मंसिर । सिरहाको धनगढीमाई नगरपालिकाले आफ्ना नगरक्षेत्र भित्रका गर्भवती महिलालाई कुपोषित हुनबाट बचाउन गर्भवती आमा पोषिलो प्याकेज कार्यक्रम ल्याएको छ ।
उक्त कार्यक्रमलाई आज प्रारम्भ गर्दै नगर प्रमुख हरिनारायण चौधरीले गर्भवती महिलालाई सुरक्षित राख्न एवम् संभावित खतरा हुनबाट बचाउन चेकजाँचको नियमितता दिनको लागि यो प्याकेज कार्यक्रम लागू गरिएको वताउनुभयो ।
नगर क्षेत्रभित्रका गर्भवती भएदेखि सुत्केरी नहुन्जेलसम्म अस्पतालमा आई नियमित जाँच गराउने सम्पूर्ण गर्भवती महिलाको लागि यो कार्यक्रम लागू गरिएको स्वास्थ्य शाखाका निमित्त प्रमुख सुरैत चौधरीले बताउनुभयो ।
नगरपालिकाले नगरक्षेत्र भित्रका सम्पूर्णका लागि सर्वसुलभ तरिकाले स्वास्थ्य सेवा दिन आफ्नै लगानीमा सुविधा सम्पन्न नयनपुर अस्पताल संचालन गरेका छन् । धनगढीमाई नगरपालिकाको वडा नं. ९ स्थित नयनपुर अस्पतालमा २४ सौं घण्टा सेवा दिइरहेको छ ।
