सुनसरी सम्वादाता, १२ साउन । सुनसरीमा पछिल्ला दिनको तनावपूर्ण अवस्था क्रमशः सामान्य बन्दै गएपछि जिल्ला प्रशासन कार्यालयले लगाइएको कर्फ्यु आदेश हटाएको छ।
जिल्ला सुरक्षा समितिको निर्णयअनुसार राजमार्गमा सवारीसाधनको आवागमन र सर्वसाधारणको आवतजावत सहज बनाउन कर्फ्यु हटाइएको हो।
यद्यपि, संवेदनशील क्षेत्रहरूमा सुरक्षा सतर्कता कायम राखिएको छ। स्थानीय प्रशासनले परिस्थितिको निरन्तर अनुगमन गरिरहेको र अवस्था पूर्ण रूपमा सामान्य भएपछि थप निर्णय गरिने जनाएको छ।
सुनसरीका विभिन्न संवेदनशील क्षेत्रमा नेपाली सेनाले निरन्तर गस्ती गरिरहेको छ। कुनै पनि अवाञ्छित गतिविधि हुन नदिन सुरक्षा व्यवस्था थप कडा पारिएको छ।
सुनसरीका प्रमुख जिल्ला अधिकारी ईश्वरीप्रसाद अर्याल र कोशी प्रदेश प्रहरी प्रमुख शेखर खनालले सोमबार राति नै आ–आफ्नो कार्यभार सम्हाले पछि अवस्था सामान्य बनाउन र शान्ति–सुव्यवस्था कायम राख्ने उद्देश्य सहित दुवै अधिकारीले जिम्मेवारी सम्हालेका हुन्। देवानगञ्ज घटनापछि जिल्लाको सुरक्षा व्यवस्थालाई थप प्रभावकारी बनाउन प्रशासन र प्रहरी सक्रिय रहेको जनाइएको छ।
जिल्ला प्रशासन कार्यालय सुनसरीले जारी गरेको आदेश अनुसार प्रमुख जिल्ला अधिकारी अर्यालले शान्ति–सुरक्षाको अवस्था क्रमशः सामान्य बन्दै गएको र जनजीवन सहज बनाउने उद्देश्यले कर्फ्यु हटाइएको बताए।
देवानगञ्ज घटनाको शोकमा हरिनगर गाउँपालिकाद्वारा आज स्थानीय बिदा दिने घोषणा गरेको छ ।
