पाँच वर्षदेखि रोगसँग जुध्दै: पेटको अल्सर र टीबीले थलिएका गोलबजारका युवालाई आर्थिकको अपेक्षा

देव नारायणको जीवनरक्षाका लागि आर्थिक सहयोगको अपिल: पाँच वर्षदेखि रोगसँग जुधिरहेका एक युवा बाबुको आँसु भिजेको कथा

महेश सिंह सिरहा – गोलबजार–३, निपानेका ३५ वर्षीय देव नारायण महरा पाँच वर्षदेखि पेटको अल्सर र पछिल्लो समयमा थपिएका क्षयरोग (टीबी)को उपचारमा संघर्षरत छन्। रोगको पीडाले थलिएका महरा अहिले आर्थिक अभावका कारण थप उपचार गर्न असमर्थ छन्। परिवारका अनुसार, देव नारायणको जीवन बचाउन थोरै पनि सहयोगको अपिल गर्दै उनीहरू देशभरका दयालु मनहरुलाई पुकार गरिरहेका छन्।
महराको उपचारको लागि परिवारले विगतमा सक्दो प्रयास गर्‍यो। भएका सम्पत्ति, जमिन बेचेर उपचार गराए। “भएको सबै बेच्यौं। अहिले त घरको एक गाँस खान पनि गाह्रो भइसक्यो,” उनका दाजु शिव नारायण महरा भक्कानिँदै भन्छन्। परिवारसँग उपचारको लागि कुनै पनि स्रोत बाँकी छैन। श्रीमती र तीन वर्षीय छोरासहितको सानो परिवार अहिले अप्ठेरो अवस्थामा छ।
पाँच वर्षदेखि रोगसँगको संघर्ष
विगत पाँच वर्षदेखि पेटको अल्सरले सताइरहेका देव नारायणको उपचार काठमाडौँको टिचिङ अस्पतालमा सुरु गरिएको थियो। केही समयका लागि सुधार भए पनि रोगले फेरि सतायो। यसक्रममा चितवनको भरतपुर अस्पतालले उनलाई क्षयरोग (टीबी) भएको पुष्टि गर्‍यो। “अल्सरले पहिले नै शिथिल बनाएको थियो, टीबीले त झन् उहाँलाई कमजोर बनाएर पूर्ण रूपमा थलिनुभयो,” उनका परिवारले बताए।
शारीरिक कष्ट मात्रै होइन, रोगले परिवारलाई भावनात्मक र आर्थिक रुपमा पनि पंगु बनाएको छ। “छोराले ‘बाबा कहिले ठीक हुन्छन्?’ भन्छ। जवाफ दिन सक्दिनँ। हरेक रात त्यो बालकको प्रश्नले मेरो मन चुँडिन्छ,” देव नारायणकी श्रीमतीले भने।
आर्थिक संकटले रोकिएको उपचार
परिवारले भएका सबै स्रोत सकाइसकेको छ। महराको उपचारका लागि बेच्न मिल्ने सबै बेचियो। अहिले घरको आर्थिक स्थिति यति कमजोर छ कि थप उपचार गराउन उनीहरू असमर्थ छन्। “डाक्टरले नयाँ उपचार विधिबारे भनेका छन्, तर हामीसँग खर्च छैन। उहाँलाई बचाउन अहिले सबैको सहयोगको खाँचो छ,” उनका दाजुले अपिल गरे।
सहयोगी हातहरूको अपिल
महराको जीवन जोगाउन परिवारले देश तथा विदेशमा रहेका सबै दयालु मनहरुलाई सहयोगका लागि आग्रह गरेको छ। “हाम्रो परिवारले जे जति गर्न सक्थ्यो, गर्‍यौं। तर अब हामीसँग केही बाँकी छैन। अब उहाँलाई बचाउन सहयोगी मनको आवश्यकता छ,” परिवारका सदस्यले भने।
सहयोगका लागि सम्पर्क विवरण
देव नारायण महराको जीवन र परिवारको भविष्य अँध्यारोमा नडुबोस् भन्ने चाहना राख्ने सबैलाई यो अपिल हो। हरेक सानो सहयोगले उनीहरूको पीडामा मलम लगाउन सक्छ। “तपाईंको सानो सहयोगले उहाँको जीवन बचाउन ठूलो भूमिका खेल्न सक्छ। मानवताको यो सन्देश धेरै ठाउँमा सेयर गरिदिनुहोस्,” महराका दाजुले थपे। मानवीयता र सहानुभूतिका आधारमा गरिएको यो अपिलले देव नारायणको जीवन रक्षामा योगदान दिन सकोस्। तपाईंको सानो प्रयासले एक परिवारलाई नयाँ जीवन र आशा दिन सक्छ।