उदयपुरसम्वादाता २४ असार — उदयपुरमा लाइन मर्मत गर्ने क्रममा करेन्ट लागेर नेपाल विद्युत् प्राधिकरणका एक कर्मचारीको मृत्यु भएको छ। मृत्यु हुनेमा बेलका नगरपालिका–९ निवासी ४० वर्षीय मिलन राई रहेका छन्।
बुधबार बिहान करिब १०।३० बजे बेलका नगरपालिकाको रामपुर स्थित अस्पताल नजिकैको विद्युत् पोलमा चढेर लाइन मर्मत गरिरहेका बेला उनलाई अचानक करेन्ट लागेको थियो। गम्भीर घाइते भएका राईलाई तत्काल उद्धार गरी उपचारका लागि विराटनगर लगिएको भए पनि चिकित्सकले दिउँसो करिब १ बजे मृत घोषणा गरेका हुन्।
स्थानीय ग्रामीण कृषि विद्युतीय रामपुरका अध्यक्ष रमण भट्टराईका अनुसार राई बेलका नगर क्षेत्रमा विद्युतीकरण सुरु भएदेखि नै विद्युत् सेवामा सक्रिय रूपमा कार्यरत थिए। हाल उनी नेपाल विद्युत् प्राधिकरण, गाईघाट शाखा अन्तर्गत बेलटार उपशाखा, रामपुरमा कार्यरत थिए।
प्रहरी स्रोतका अनुसार मृतकको शव पोस्टमार्टमका लागि अस्पतालमा राखिएको छ। जिल्ला प्रहरी कार्यालय उदयपुरले घटनाबारे थप अनुसन्धान भइरहेको बताए।
