केही दिनका लागि हवाइ उडान अस्थायी रूप अस्थिगित

लहान १९ फाल्गुन । क्षेत्रीय हवाई क्षेत्र प्रतिबन्धका कारण नेपाल एअरलाइन्सले यूएई, कतार र साउदी अरेबियातर्फका उडान अस्थायी रूपमा स्थगित गरेको जनाएको छ ।एयरलाइन्सका अनुसार यूएईको दुबई, कतारको दोहा र साउदी अरेबियाको दमामतर्फका उडान हाललाई रोकिएको हो । प्रतिबन्ध कायम रहेसम्म यी गन्तव्यका उडान सञ्चालन नहुने जनाइएको छ ।

उडान स्थगनबाट प्रभावित यात्रुहरूलाई सहुलियत दिन एअरलाइन्सले विशेष ‘वेभर’ नीति लागु गरेको छ । फेब्रुअरी २८ वा त्यसपछि यी तीनै ठाउँका लागि टिकट लिएका तथा उडान पुनः सञ्चालन नभएसम्म यात्रा गर्ने यात्रुका लागि निम्न व्यवस्था गरिएको जनाइएको छ ।

एकपटक मिति परिवर्तन गर्दा लाग्ने शुल्क नलिइने, ‘नो शो’ तथा रिफन्ड शुल्क माफी र सिट उपलब्धताका आधारमा ‘पहिले आउनेलाई पहिले सेवा’ प्रणालीअनुसार मिति परिवर्तन सुविधा ।
एअरलाइन्सका अनुसार यो सहुलियत यात्रा मितिभन्दा ४५ दिनभित्र प्रयोग गर्नुपर्नेछ । प्रभावित यात्रुले नेपाल एयरलाइन्सको प्रधान कार्यालय वा सम्बन्धित बिक्री कार्यालयमा सम्पर्क गर्न सक्ने पनि जनाइएको छ ।
एयरलाइन्सले सम्बन्धित निकायसँग समन्वय गर्दै अवस्था नजिकबाट अनुगमन गरिरहेको र परिस्थिति सामान्य हुनासाथ नियमित उडान पुनः सुरु गरिने जनाएको छ ।