काठमाडौं २६ चैत।नेपाल औषधि लिमिटेडले स्यानिटाइजर उत्पादन सुरु गरेको छ । लिमिटेडले एक सय मिलिलिटरको बोतलमा स्यानिटाइजर उत्पादन गर्न थालेको हो ।
दैनिक २० हजार बोतल स्यानिटाइजर उत्पादन गरिरहेको भन्दै लिमिटेडका स्टोर प्रमुख दिनेश भट्टराईले नेपाल आर्मी अस्पताल, प्रधानमन्त्री तथा मन्त्रिपरिषद्को कार्यालय तथा विभिन्न बैंक र सरकारी निकायले लिमिटेडले उत्पादन गरेको स्यानिटाइजर अर्डर गरेको जानकारी दिए । 
यसबाहेक लिमिटेडले बजारमा पनि स्यानिटाइजर पठाउने बताएको छ । लिमिटेडले उत्पादन गरेको स्यानिटाइजरको बजार मूल्य एक सय ७५ रुपैयाँ तोकिएको छ । औषधि व्यवस्था विभागको स्वीकृति लिएर उत्पादन गरिएको स्यानिटाइजर विश्व स्वास्थ्य संगठनको मापदण्डअनुसारको रहेको पनि लिमिटेडले दाबी गरेको छ ।
लिमिटेडले उत्पादन सुरु गरेको स्यानिटाइजरमा ८० प्रतिशत अल्कोहल र बाँकी पानी तथा ग्लिसिरिन मिसाइएको छ ।लिमिटेडले सानो बोतलबाहेक ठूलो जार, भाँडो र ग्यालिनमा पनि स्यानिटाइजर उपलब्ध गराउने भएको छ । लकडाउन भएलगत्तै लिमिटेडले स्यानिटाइजर उत्पादन सुरु गरेको हो । स्यानिटाइजर उत्पादनका लागि अहिले लिमिटेडमा एक सयभन्दा बढी कर्मचारी खटिएका छन् ।साभार :नयाँ पत्रिका
