ग्लोबल वार्मिङविरुद्धको अभियान: इटहरीमा शिखर सम्मेलनको आयोजना

महेश सिंह सिरहा लहान – सुनसरीको इटहरीमा परमेश्वरको मण्डली विश्व सुसमाचार समाज नेपाल र ASEZ (विश्वविद्यालय विद्यार्थी स्वयंसेवक समूह) को आयोजनामा शिखर सम्मेलन तथा विश्व शान्ति कन्सर्ट भव्य रूपमा सम्पन्न भएको छ। कार्यक्रमले जलवायु परिवर्तन, वातावरणीय क्षति, र पृथ्वी पुनर्स्थापनाको महत्त्वबारे जनचेतना अभिवृद्धिमा योगदान पुर्‍याएको छ।
कार्यक्रमको केन्द्रबिन्दु पृथ्वी पुनर्स्थापना परियोजना (Earth Recovery Project) थियो। यो परियोजनाले विश्वव्यापी रूपमा बढिरहेको भूमि क्षयीकरण, मरुभूमिकरण, र खडेरीका समस्या समाधान गर्न जनसहभागिता र सचेतना विस्तार गर्ने उद्देश्य राखेको थियो।
कार्यक्रमका प्रमुख अतिथि कोसी प्रदेशका आन्तरिक मामिला तथा कानुन मन्त्री रेवतिरमण भण्डारीले वातावरणीय समस्यालाई समाधान गर्न राज्य र समाजको सहकार्य आवश्यक रहेको बताउनुभयो। इटहरी उपमहानगरपालिकाकी उपमेयर सङ्गीता कुमारी चौधरीले दिगो विकास र वातावरणीय संरक्षणबीच सन्तुलन कायम गर्नुपर्नेमा जोड दिनुभयो।
कार्यक्रममा परमेश्वरको मण्डली विश्व सुसमाचार समाज नेपालका अध्यक्ष तेजेन्द्र गौतम, विश्व आदर्श कलेजका प्राचार्य गणेश कुमार दुलाल, र प्रदेश १ का प्रमुख सुमन योञ्जन लगायत विशिष्ट वक्ताहरूले मन्तव्य दिनुभयो।
कार्यक्रममा समाज विकास मन्त्री जीवन घिमिरे, प्रदेशसभा सदस्य रोहित बहादुर कार्की, पूर्व स्वास्थ्य मन्त्री निर्मला तावा लिम्बु लगायत ४२० भन्दा बढी सहभागीहरूको उपस्थिति रहेको थियो।
पूर्व मन्त्री लिम्बुले “युवा शक्तिलाई वातावरणीय अभियानमा समाहित गर्दै मुलुकलाई जलवायु संकटबाट जोगाउन जनस्तरबाटै अभियान चलाउन आवश्यक छ,” भन्नुभयो। मन्त्री घिमिरेले विकास र संरक्षणलाई सँगै अघि बढाउनुपर्ने औंल्याउँदै, “विकासका नाममा प्रकृति विनाश स्वीकार गर्नु कहिल्यै उचित हुँदैन,” भन्नुभयो।
कार्यक्रममा भएको गायन तथा सांगीतिक प्रस्तुतिले सहभागीहरूमा सकारात्मक ऊर्जा थपेको थियो। सांगीतिक कार्यक्रमले वातावरणीय समस्यालाई सिर्जनात्मक तरिकाले प्रस्तुत गर्दै जनचेतना फैलाउन भूमिका खेलेको आयोजकले बताए।
ASEZ ले नेपाल लगायत विश्वभर जलवायु परिवर्तनविरुद्ध विभिन्न कार्यक्रम सञ्चालन गर्दै आएको छ। यसले आपतकालीन राहत कार्य, सरसफाइ अभियान, र स्वास्थ्य परीक्षणका साथै वृद्धवृद्धाहरूको स्वास्थ्य सेवा जस्ता कार्यक्रमहरू सञ्चालन गरेको छ।
कार्यक्रमबारे जानकारी दिँदै परमेश्वरको मण्डली लहानका प्रमुख हेमन्त राजीले भने, “यो परियोजना केवल सचेतना फैलाउन मात्र होइन, स्थानीय तथा अन्तर्राष्ट्रिय स्तरमा सकारात्मक परिवर्तन ल्याउन उद्देश्यित छ।”
कार्यक्रमको समापनमा सहभागीहरूले व्यक्तिगत र सामूहिक दायित्वबोध गर्दै जलवायु परिवर्तनविरुद्ध पहल गर्ने प्रतिबद्धता व्यक्त गरेका थिए।
लहान मण्डलीका प्रतिनिधि सुशील कुमार शर्माका अनुसार कार्यक्रमको उद्देश्य विश्वव्यापी चुनौती बनेको ग्लोबल वार्मिङको समाधान खोज्दै मुलुकलाई संकटबाट जोगाउनु हो।
इटहरीमा सम्पन्न शिखर सम्मेलनले वातावरणीय मुद्दामा सचेतना विस्तार गर्दै पृथ्वी संरक्षणका लागि समाज र सरकारलाई एकसाथ अघि बढ्न प्रेरित गरेको सुशील कुमार शर्माले जानकारी दिनु भयो।