शम्भु चौधरी लहान, १४ पुस । तराईमा शितलहर बढ्दै गएपछि लहान नगरपालिकाले राहत स्वरूप दलित तथा अति विपन्न परिवारलाई न्यानो फाईबर सिरक वितरण कार्यलाई निरन्तरता दिएको छ । त्यही क्रममा आज लहान नगरपालिका २१ दास बस्तीमा १ सय १४ थान फाइवर सिरक वितरण गरेको समावसेवी असेश्वर यादवले बताए ।
नगर प्रमुखको नेतृत्वमा पालिकाका विभिन्न वडामा क्रमिक रूपमा फाइबर सिरक वितरण गरिँदै आएको छ । यसै क्रममा आज लहान नगरपालिका २१ माधोपुरमा दलित तथा अति विपन्न परिवारलाई फाइबर सिरक वितरण गरिएको हो ।
नगर प्रमुखले चिसोका कारण कुनै पनि नागरिक समस्यामा नपरोस् भन्ने उद्देश्यले नगरपालिकाले चरणबद्ध रूपमा सबै वडामा राहत वितरण गरिरहेको बताउनुभयो । उहाँले आगामी दिनमा पनि आवश्यकताको आधारमा सहयोगलाई निरन्तरता दिइने प्रतिबद्धता जनाउनुभयो ।
माधोपुरका स्थानीय नेता तथा अगुवा कार्यकर्ताहरुले नगरपालिकाको यस पहलप्रति आभार व्यक्त गर्दै चिसो मौसममा न्यानो सिरक पाउँदा राहत महसुस भएको सहमती जनाएका थिए । नगरपालिकाले सामाजिक उत्तरदायित्व अन्तर्गत दलित, असहाय तथा विपन्न समुदायलाई प्राथमिकतामा राखेर कार्यक्रम सञ्चालन गर्दै आएको जनाएको छ ।
