शम्भु चौधरी, लहान १६ पुस । दहेज प्रथा समाजको विकृति हो ने मुल नाराका साथ बलानबिहुल युवा सञ्जालको आयोजनामा एकदिने महिला सशक्तिकरण तथा दहेज प्रथा विरुद्ध सचेतना कार्यक्रम आज भव्य रूपमा सम्पन्न भएको छ।
कार्यक्रमकी प्रमुख अतिथि सक्रिय सामाजिक अभियन्ता अनिता यादव रहनु भएको थियो। प्रमुख अतिथि यादवका अनुसार महिलामाथि हुने विभेद, हिंसा र दहेज प्रथाजस्ता कुप्रथाले समाजलाई पछाडि धकेलिरहेको बताउनुभयो। उहाँले महिलालाई आत्मनिर्भर, शिक्षित र सचेत बनाउनु नै दहेज प्रथा अन्त्यको प्रभावकारी उपाय भएको उल्लेख गर्दै महिलाले आफ्नो अधिकारका लागि आवाज उठाउनुपर्ने आवश्यकता औंल्याउनुभयो।
कार्यक्रममा विशेष अतिथि बलानबिहुल गाउँपालिकाका अध्यक्ष खेमचन्द्र यादव रहनु भएको थियो । वहाँका अनुसार गाउँपालिकाबाट महिला सशक्तिकरणका लागि विभिन्न कार्यक्रम तथा नीतिहरू सञ्चालन गर्दै आएको जानकारी दिनुभयो। दहेज प्रथा समाजको गहिरो रोग भएको उल्लेख गर्दै उहाँले यसको अन्त्यका लागि कानुनी व्यवस्था मात्र होइन, सामाजिक सोच परिवर्तन अत्यावश्यक रहेको धारणा व्यक्त गर्नुभयो। स्थानीय तहबाट यस्ता चेतनामूलक कार्यक्रमलाई निरन्तर सहयोग गर्ने प्रतिबद्धता पनि उहाँले जनाउनुभयो।
कार्यक्रममा महिला अधिकार, दहेज प्रथाको कानुनी पक्ष, सामाजिक प्रभाव र समाधानका उपायबारे अन्तरक्रिया तथा छलफल गरिएको थियो। सहभागीहरूले दहेज प्रथा विरुद्ध सामूहिक अभियान चलाउनुपर्ने, विवाहलाई सादगीपूर्ण बनाउने संस्कृतिको विकास गर्नुपर्ने र छोरीलाई बोझ होइन सम्मानको रूपमा हेर्ने सोच विकास गर्नुपर्ने सुझाव दिएका थिए।
विशेष अतिथिहरूमा पूर्व गाउँपालिका अध्यक्ष दयानन्द गोइत तथा वडा १ को वडा अध्यक्ष राम कुमार यादव,समाजसेबि दुर्गा प्रसाद शर्मा, रामेश्वर यादव, देबु चौधरी , प्रमोद कुमार यादव, डा. गुर्गेन्द मघैया यादव, कार्यपालिका सदस्यहरु, वडा सदस्यहरु, सम्पुर्ण बलान बिहुल युवा संजालका युवाहरुको उपस्थिति रहेको थियो।
आयोजक संस्था बलानबिहुल युवा सञ्जालको अध्यक्ष मुकेश कुमार पासमानले यस्ता कार्यक्रमले समाजमा सकारात्मक सन्देश प्रवाह हुने विश्वास व्यक्त गर्दै आगामी दिनमा पनि सामाजिक रुपान्तरणका लागि निरन्तर सक्रिय रहने प्रतिबद्धता जनाएको छ। कार्यक्रमको समापन सबै सहभागीहरूले दहेज प्रथा विरुद्ध एकजुट भएर लाग्ने संकल्पसहित गरिएको थियो।
बलानबिहुल गाउँपालिकाको सभा हलमा सम्पन्न भएको छ। उक्त कार्यक्रममा स्थानीय जनप्रतिनिधि, समाजसेवी, युवा युवती तथा सर्वसाधारणको उल्लेखनीय सहभागिता रहेको थियो।
यस कार्यक्रमले बलानबिहुल क्षेत्रमा महिला सशक्तिकरण र दहेज प्रथा विरुद्धको अभियानलाई थप सशक्त बनाउने अपेक्षा गरिएको कुरा कार्यक्रम संचालक दुर्गा प्रसाद यादवले जनाएको छ।
