सचिता चौधरी लहान २ जेष्ठ । सिराहाको लहान नगरपालिका–१५ मा अवस्थित ऐतिहासिक तथा धार्मिक स्थल राजदेवी पंचावति मन्दिर परिसरमा लोटस इंगलिस बोर्डिंग स्कुल लहान ८ का विद्यार्थीहरूको सक्रियतामा एक दिने सरसफाई अभियान सञ्चालन गरी मन्दिर क्षेत्रलाई पूर्ण रूपमा सफा गरिएको छ ।
अभियानमा कक्षा ५ का सेक्सन क, ख, र ग का १ सय ३ जना विद्यार्थी र ४ जना शिक्षक शिक्षिकाहरूको टोलीले मन्दिर परिसर भित्र र बाह्य क्षेत्रमा रहेका फूलपाती, प्लास्टिक र फोहरजन्य वस्तुहरू संकलन र व्यवस्थापन गरेका हुन् ।
पाठयक्रममा आधारीत धार्मिक तथा पर्यटकीय क्षेत्रलाई सफा र सौन्दर्य करण होस तथा समाज प्रतिको जवाफदेहि भने उद्देश्य राखी यो कार्यक्रम गरिएको सहभागी शिक्षिका इन्द्र नारायण सिंह महतोले बताए ।
उक्त मन्दिर, जसमा विशेषगरी वैशाख पूर्णिमा अर्थात बुद्ध जयन्तीको अवसरमा लाखौं श्रद्धालुहरू छिमेकी जिल्ला र भारतको बिहार क्षेत्रबाट दर्शन गर्न आउँछन्, वर्षौंदेखि सन्तान प्राप्तिका लागि भाकल गर्ने र बोका, परेवा बलि दिने, फूलपाती, मिठाई चढाउने धार्मिक परम्पराका कारण चर्चित रहँदै आएको छ । यस्ता अवसरहरूमा बढ्दो भिडका कारण मन्दिर क्षेत्रमा फोहरको समस्या हुने गरेको र यसलाई व्यवस्थित गर्ने उद्देश्यले सरसफाई अभियान सञ्चालन गरिएको बताइएको छ ।
यस कार्यक्रमले धार्मिक स्थलमा स्वच्छता कायम गर्न स्थानीय समुदाय र शैक्षिक संस्था बीचको सहकार्य कस्तो प्रभावकारी हुन सक्छ भन्ने उदाहरण प्रस्तुत गरेको छ ।
