शम्भु चौधरी, लहान २१ वैशाख । धनगढीमाइ नगरपालिकामा एक दिने नगरपालिका स्तरीय अगुवा कृषक तालिम सम्पन्न भएको छ ।
कार्यक्रमको पहिलो सत्रमा पालिका उप–प्रमुख सङीता कुमारी चौधरीले मन्तव्य दिँदै कृषकलाई तालिमबाट अधिकतम लाभ उठाउन अनुरोध गर्नुभयो। उहाँले धान खेतीलाई कसरी आधुनिकरण गरी उन्नत बनाउने भन्नेबारे महत्वपूर्ण विचार प्रस्तुत गर्दै तालिममा सहभागी सबैलाई प्रशिक्षकको कुरा ध्यानपूर्वक सुन्न र प्रस्ट नबुझिए खुला रूपमा प्रश्न गर्न आग्रह गर्नुभयो ।
तालिम प्रशिक्षक मो. रहमुल राइनले तालिमको सुरुवात धान खेतीमा प्राविधिक सुधार, उन्नत बीउको प्रयोग, मल र पानी व्यवस्थापन जस्ता विषयमा सहभागीलाई विस्तृत जानकारी गराउनुभयो ।
त्यस्तै अर्का प्रशिक्षक कृषि विकास अधिकृत मसिलाल साहले रोग किरा व्यवस्थापन तथा विषादि प्रयोगको मात्रा बारे छलफल गराउनुभएको छ ।
प्राकृतिक अस्पताल सभा हलमा सम्पन्न उक्त तालिमको अध्यक्षता कृषि संयोजक सूर्य नारायण यादवले गर्नुभएको थियो ।
कार्यक्रमको आयोजना धनगढीमाइ नगरपालिकाको कृषि विकास शाखा, धनगढी, सिरहाले गरेको हो। तालिममा धान खेतीसम्बन्धी आधुनिक प्रविधि, व्यवस्थापन र उत्पादन वृद्धि गर्न सकिने उपायबारे जानकारी दिइएको थियो।
उक्त तालिममा नगरपालिका भित्रका विभिन्न वडाबाट ३० जना अगुवा कृषकहरूको उत्साहजनक सहभागिता रहेको थियो । कार्यक्रमले कृषकहरूलाई नवीन ज्ञान र सीप प्रदान गरी आगामी दिनमा उत्पादन र आम्दानीमा सकारात्मक प्रभाव पार्ने अपेक्षा गरिएको छ।
