पर्सा प्रहरीको कपि– पेष्ट अभियान, वास्तविकता भन्दा पर गएर प्रचारबाजीमा सिमित

आराहण शाह वीरगञ्ज, ४ भदौं । जिल्ला प्रहरी कार्यालय पर्सामा विगत २ महिनादेखी कार्यभार सम्हाली रहनु भएका प्रहरी उपरिक्षक शोभेन्द्र सिंह राठौरले आफ्नो अहिले सम्मको कार्यकालमा लागुऔषध, तस्करी, अपराधी, हुण्डी कारोबारी, जाली नोट इत्यादीका अभियुक्तहरुलाई पक्राउ गरी आवश्यक कार्यवाही गरेको सर्वविदितै छ ।
तर विभिन्न मुद्दामा पक्राउ परेका दोषीहरुलाई सार्वजनिक गर्ने अथवा सञ्चारक्ष्ँेत्रलाई सूचित गर्नेतर्फ अहिलेको प्रशासनको काम कार्यवाही फितलो देखिएको । पर्सा जिल्लामा प्रहरी प्रमुखको कार्यभार सम्हालेदेखि जिल्ला प्रहरी कार्यालय पर्साको प्रवक्ताको जिम्मा पाएका डिएसपी अनन्तराज शर्मा र सञ्चारकर्मीहरु विच सूचना दिने विषयमा दुरी बढ्दै गएको देखिएको छ । त्यसको प्रमुख कारण जिल्ला प्रहरी कार्यालयको सूचनालाई आफै रेडिमेट समाचार बनाई आफू निकटस्थ संचारकर्मीहरुलाई इमेल वा अन्य माध्यमद्वारा हस्तान्तरण गर्नु र आफूले पठाएको सामाग्रीलाई हुबहु आफु निकट सञ्चार माध्यममा प्रचार प्रसार गर्न लगाउनु नै देखिएको छ । प्रहरी अधिकृतको यस्तो कृयाकलापले प्रहरीमाथि शंका गर्ने ठाउं पनि स्थानीयले प्रसस्तै पाएका छन् ।
एक श्रोतका अनुसार हुण्डी जस्ता कारोबारीहरु पक्राउ र निजहरुबाट प्रहरीले बरामद गरेको रकम र सञ्चार माध्यमहरुमा प्रकाशित समाचारका अनुसार रहेको रकममा फरक रहेको देखिन्छ । तस्करीको अन्य अपराधीहरुसंग पनि सोही अनुसारको कार्यवाही भएको विगतमा नदेखिएको हैन । कमलाई बढी र बढीलाई कम गरेर सार्वजनिक गर्ने परिपार्टी बसेको पनि धेरै भएको छैन । विगतका दिनमा जिल्ला प्रहरी कार्यालय पर्सामा कार्यरत प्रहरी अधिकृतहरु डा. गणेश रेग्मी तथा रेवती ढकालको कार्यकालमा विभिन्न शिर्षकमा पक्राउ परेका दोषी अथवा अवैध सामाग्रीहरुलाई यथाशिघ्र पत्रकार सम्मेलन गराई सार्वजनिक गर्ने कार्यशैलीकै कारण पत्रकार लगायत स्थानीयहरु समेतले प्रहरीको कार्यशैलीमाथि प्रश्न गर्ने ठांउ भेटाएनन् ।
देशमा रहेका विभिन्न टि.भी., पत्र पत्रिका, अनलाईन सञ्चारमाध्यमहरुमा कार्यरत सञ्चारकर्मीहरुलाई प्रहरी कार्यालयबाट पठाईएको समाचारले पुग्दैन । स्थलगत रिपोर्टिङ, समाचारको आधार र सम्बन्धित अधिकृतको वक्तव्यनै नभएर प्रहरीले अनलाईन पठाएको सुचना प्रकाशन प्रसारण गर्दा विगतमा अधिकृतहरुको दर्जा र नामै फरक परेको कारण समस्या खडा भएको थियो ।
नारायणी यातायात व्यवस्था कार्यालय वीरगञ्जबाट पक्राउ परेका चारजना विचौलियाहरुबारे यातायात कार्यालयको हाताभित्र विहान ७ः४५ बजे पक्राउ गरिएको सम्बन्धी प्रकाशित प्रसारित समाचारहरुको सूचना पर्सा प्रहरीले सञ्चार माध्यमहरुलाई सांझ ७ बजे मेल गरि जानकारी दिनुको पछाडीको कारण पहिल्याउन जरुरी छ । विगत यही पर्सा प्रहरीले विभिन्न मुद्दामा पक्राउ परेका दोषीहरुलाई १ घण्टा वित्न नपाउंदै सार्वजनिक गरि सूचना दिनु र अहिलेको दिनमा १२ घण्टा पछि घट्नालाई तोड मरोड गरेर समाचार नै तयार गरी आफु निकटस्थको माध्यमले प्रकाशन प्रसारण गराउनुको औचित्यबारे आम नागरिक सोंच्न बाध्य छ ।
आम नागरिकको सूचित हुने अधिकार र त्यो अधिकारलाई आम नागरिकसम्म पु¥याउने अभिभारा बोकेका सञ्चारकर्मीको जिज्ञासालाई आफ्नै अनुकुल बनाएर बाहिर प्रचारबाजी गर्नु र सत्य तथ्यलाई भ्रमको रुप दिएर जनता ढांट्ने कार्य कदापी सही हुन सक्दैन । पर्सामा प्रहरी उपरिक्षकको जिम्मा सम्हाल्नु भएका प्रहरी प्रमुखसंग आम नागरिकको धेरै आकांक्षाहरु छन् । त्यसै आकांक्षालाई मूर्त रुप दिन पर्सा प्रहरीले आफ्नो कार्यशैलीलाई अझ प्रखर बनाउंदै जनतामुखी र सञ्चारमाध्यम मुखी हुनु अहिलेको आवश्यकता देखिन्छ ।