दाङ उपत्यकमा झण्डै एक हप्तादेखि पेट्रोलयम पदार्थको चरम अभाव

ट्याङकर चालकहरुको आन्दोलनका कारण दाङ उपत्यकमा झण्डै एक हप्तादेखि पेट्रोलयम पदार्थको चरम अभाव छ । तर देउखुरी क्षेत्रमा भने समस्या नभएको नेपाल आयल निगम डिपो तुलसीपुरले जनाएको छ ।
उपभोक्ताहरुको मागलाई मध्यनजर गरी हाललाई आयल नियमको सानो ट्याङकरबाट ९ हजार लिटर डिजल,९ हजार लिटर पेट्रोल र मट्टी तेल दाङ उपत्यकमा दैनिक रुपमा ढुवानी भई रहेको नेपाल आयल निगम डिपो तुलसीपुरले जानकारी दिएको छ । उक्त डिपो कार्यालयबाट दाङ उपत्यकाका २९ वटा पेट्रोल पम्प, सल्यानको थारमारे, रोल्पाको होलेरी, रुकुममा एक एक वटा ३२ र मट्टितेलका ३ गरी ३५ वटा पेट्रोलपम्पमा १ लाख २० हजार लिटर डिजल र ३२ हजार लिटर दैनिक रुपमा खपत हुने गरेको छ ।
नेपालगञ्जबाट ढुवानी गरी दाङ उपत्यकमा ल्याउदा तापक्रमका कारण पेट्रोलियम पदार्थ घट्ने र घटेको पेट्रोल ढुवानीकर्ता अर्थात चालकले पुर्ति गर्नुपर्ने भएपछि ढुवानी सेवा गत असार २६ गतेदेखि बन्द गरेका हुन ।
४१ डिग्री सेल्सीयसबाट २२÷२६ डिग्री सिल्सीयस तापक्रम भएको स्थानमा ल्याउदा पेट्रोलियम पदार्थको मात्रा घट्ने नेपाल आयल नियम डिपो तुलसीपुरका सुचना अधिकारी सूर्यप्रसाद आचार्यले जानकारी दिनुभयो ।
१ डिग्री सेल्सीयस तापक्रममा १५ लिटर डिजल र पेट्रोलमा २१ लिटर सम्म मात्रा घट्ने गरेको आचार्यले बताउनुभयो ।
घट्न गएको पेट्रोलिय पदार्थको ४० हजार मूल्य बराबर चालकले तिर्नुपर्ने हुन जान्छ ।
तापक्रमका कारण घटेको पेट्रोलियम पदार्थको मूल्य चालकले स्वयम पुर्ति गर्नुपर्ने भएकाले यसरी ढुवानी गर्न नसकिने उनीहरुले अडान लिएका छन् । ढुवानी सेवा सञ्चालनका लागि राजधानी काठमाण्डौमा भोली बुधबार बैठक बस्ने र त्यसबाट निकास निस्कने बिश्वास आयल निगम डिपो तुलसीपुरको बिश्वास छ ।